काठमाडौं । संस्कृति पर्यटन तथा नागरिक उड्डयनमन्त्री सुदन किरातीले पुर्खाको शिर निचो पारेर मन्त्री पदमा नबस्ने वाचा गरेका छन् । ‘बैंकको लकरमा गोली राख्ने’ ल्हारक्याल लामालाई लुम्बिनी विकास कोषको उपाध्यक्ष बनाएका मन्त्री किरातीले पुर्खाको शिर निचो नपार्ने वाचा गरेका हुन् ।

किरात राई यायोक्खा स्थापना दिवसमा पर्यटनमन्त्री किरातीले आफ्नो मन्त्री पद जनसुकै बेला जान सक्ने पनि बताए ।

“मन्त्री त भोरे पनि जान सक्छ, जावोस् । म मन्त्री बन्नको लागि पनि जन्मेको हैन । मलाई बाआमाले मन्त्री बन्नको लागि जन्माएको पनि होइनन् । मलाई त मन्त्री पदमा टाँसिइ राख्नुपर्ने पनि छैन । राईको छोरा ६ महिना मन्त्री भइहालेँ । मेरो बाबाजे वडाध्यक्ष पनि भएका थिएनन् । त्यसकारण मलाई चिन्ता छैन,” मन्त्री किरातीले भने, “तर, एक मिनेट रहुँ, एक घण्टा रहुँ, हाम्रो पुर्खाको शिरलाई निचो पारेर बस्न सक्दिनँ । यही वाचा गर्छु ।”

दोहोरो नागरिकता तथा राहादानी, वैदेशिक रोजगारीमा ठगी र तिब्बती शरणार्थी परिचयपत्र तथा बैंकको लकरमा गोली राखेकोलगायत आरोपसहित विवादमा तानिएका लामालाई सरकारले लुम्बिनी विकास कोषको उपाध्यक्ष नियुत्त गरेको थियो । मन्त्री किरातीको सिफारिसमा मन्त्रिपरिषद् बैठकले लामालाई उपाध्यक्ष नियुक्त गरेको हो ।