काठमाडौं । लामो समयदेखि प्रतीक्षित सुजुकीका दुई एसयूभी नेपालमा भित्र्याइएको छ । देशभरका सुजुकीका शो रुममा हेर्न र टेस्ट ड्राइभका लागि यही साउन २२ गतेदेखि गाडी उपलब्ध गराइने भएको छ ।

सोही दिन सुजुकी शो रुममा जिम्नी र फ्रोन्क्सको अनावरण गरिने कम्पनीले जनाएको छ ।

सुजुकीका चारपांग्रे सवारीसाधनका लागि नेपालको आधिकारिक वितरक सीजी होल्डिङ्सअन्तर्गतको अटोमोटिभ डिभिजन सीजी मोटोकर्प तथा सीजी नेक्स्टजेनले गएको असार २९ गतेदेखि नै यी गाडीको बुकिङ खुला गरेको थियो ।

सुजुकी जिम्नीको सुरुआती मूल्य ५९ लाख ९९ हजार र फ्रोन्क्सको सुरुआती मूल्य ३९ लाख ९९ हजार रुपैयाँ रहेको कम्पनीले जनाएको छ ।

पाँच ढोका भएको सुजुकी जिम्नी नेपाल र अन्तर्राष्ट्रिय बजारमा सबैभन्दा प्रतीक्षित कारमध्ये एक भएको कम्पनीको जिकिर छ । यो मोडेलको माग विश्वभर नै उच्च रहेको कम्पनीको भनाइ छ ।

सुजुकी जिम्नी अल्टिमेट अफ रोड एसयूभी हो । यो हेभी–ड्युटी ल्याडर फ्रेम चेसिसमा निर्मित छ । यसमा पर्याप्त बडी एन्गल र ग्राउन्ड क्लियरेन्स उपलब्ध छ ।

यो एसयूभी फोरडब्ल्यूडी प्रणाली, अलग्रिप प्रोसहित आउने र ब्रेक लिमिटेड स्लिप डिफरेंसियल एवं थ्रिलिंक रिजिड एक्सल सस्पेन्सजस्ता अफ रोड सुविधा समावेश रहेको कम्पनीले जनाएको छ ।

जिम्नीमा २.६८ सेमी स्मार्टप्ले प्रो इन्फोटेनमेन्ट सिस्टम, ६ एयरब्याग, इलेक्ट्रोनिक स्टेबिलिटी कन्ट्रोल, अटो टेम्परेचर कन्ट्रोल, हिल डिसेन्ट कन्ट्रोलजस्ता धेरै आधुनिक, आरामदायी र सुरक्षित सुविधा पनि छन् ।

यस्तै, सुजुकी फ्रोन्क्स नयाँ जेनेरेसनको स्टाइल र प्रिमियम मिश्रित एसयूभी भएको कम्पनीको भनाइ छ । ‘द फेस अफ न्यु एसयूभी’ भनिएको सुजुकी फ्रोन्क्स निकै आकर्षक र स्पोर्टी देखिन्छ । यसमा रहेको अत्याधुनिक प्रविधिले आरामदायी र सुरक्षित अनुभूति प्रदान गर्ने कम्पनीले जनाएको छ ।

प्रिमियम डिजाइन, नयाँ युगको फिचर्स, अत्याधुनिक सुरक्षित सुविधाले सुसज्जित फ्रोन्क्सले आधुनिक नेपाली ग्राहकका लागि सम्पूर्ण माग पूरा गर्ने कम्पनीको विश्वास छ ।