काठमाडौं । नेकपा (माओवादी केन्द्र)को यही साउन १७ गतेदेखि बस्ने पार्टी केन्द्रीय कमिटीको बैठकमा प्रस्तुत गरिने राजनीतिक र सांगठनिक प्रतिवेदनबारे आन्तरिक छलफल सुरु गरिएको छ । शनिबार प्रधानमन्त्रीको सरकारी निवास बालुवाटारमा बसेको पार्टी पदाधिकारीको बैठकमा सो बैठकमा प्रस्तुत गरिने राजनीतिक प्रतिवेदनमाथि छलफल थालिएको हो ।

संगठन विभाग र उपाध्यक्षहरूले तयार पारेको राजनीतिक प्रतिवेदनको मस्यौदामाथि छलफल सुरु गरिएको पार्टीका सचिव चक्रपाणि खनालले जानकारी दिए । त्यसलाई निष्कर्षमा पुर्‍याउनका लागि आइतबार (भोलि) पनि पदाधिकारी बैठक बोलाइएको उनले बताए ।

उनका अनुसार पार्टीको केन्द्रीय कमिटीको बैठक बस्नुअघि स्थायी कमिटीको बैठक बोलाएर त्यसका एजेन्डाहरू टुंगो लगाउने विषयमा नेताहरूबीच सहमति भएको छ ।

“केन्द्रीय समितिको बैठकलाई मध्यनजर राख्दै यो बैठक आजको प्रतिवेदनको तयारी, संगठनात्मक प्रतिवेदन, राजनीतिक प्रतिवेदन र त्यसपछि केन्द्रीय समितिको बैठकलाई कसरी लैजाने र पदाधिकारीहरूको सुझाव के छ ? त्यसबारे मुख्य छलफल भयो । त्यसपछि स्थायी समिति बैठक केन्द्रीय समिति बैठकअघि नै बोलाउने र त्यो बैठकबाट फेरि केन्द्रीय समितिलाई अलि व्यवस्थित र पूर्ण रूपमा कसरी लैजाने भन्ने बारेमा छलफल भयो । र, यसलाई मूर्तरूप दिनेबारे भोलि पनि बैठक बस्ने भनेर आजको बैठक टुंगियो,” उनले भने, “कमरेड अध्यक्ष इटाली जानुअघि पनि पदाधिकारी बैठक बसेको थियो । त्यो बैठकमा राजनीतिक प्रतिवेदनको बारेमा छलफल गरेर मोटामोटी आकार तयार गर्ने र त्यसपछि आजको बैठकमा प्रस्तुत गर्ने भनिएको थियो । त्यो मोटामोटी प्रस्तुत गर्नुभएको छ । अब त्यसलाई संश्लेषित गरेर अध्यक्षले प्रतिवेदन बनाउनुहुन्छ । संगठन विभाग र उपाध्यक्षहरूलाई सो जिम्मेवारी दिइएको थियो । आज लिखित, मौखिक दुवै रूपमा प्रस्तुत पनि गर्नुभयो ।”