काठमाडौं । मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८० प्रतिनिधिसभाबाट भएको संशोधन स्वीकारसहित पुनः पारित गरियोस् भन्ने प्रस्ताव राष्ट्रियसभाबाट स्वीकृत भएको छ । राष्ट्रियसभाको बिहीबार बसेको दोस्रो बैठकबाट उक्त विधेयक सर्वसम्मतिले स्वीकृत गरिएको हो ।

सरकारले अनुचित लेनदेन (मिटरब्याज)सम्बन्धी समस्या समाधानका लागि यो विधेयक अघि बढाएको थियो । अब यो विधेयक राष्ट्रियसभाका अध्यक्ष गणेशप्रसाद तिमिल्सिनाले प्रमाणित गरेर राष्ट्रपति रामचन्द्र पौडेलसमक्ष पठाउनेछन् । राष्ट्रपतिले प्रमाणित गरेपछि कानुन बन्नेछ ।

“राष्ट्रियसभाले प्रतिस्थापन विधेयकको रूपमा पारित गरेर पठाएको थियो । तर, प्रतिनिधिसभाले त्यसलाई विधेयकका रूपमा पारित गरेर पठायो । उद्देश्य र प्रयोजन नै फरक परेपछि राष्ट्रियसभाले अघि बढाउन मिल्ने अवस्था थिएन,” राष्ट्रियसभामा नेपाली कांग्रेसकी प्रमुख सचेतक रहेकी अनिता देवकोटाले बाह्रखरीसित भनिन्, “नागरिकसँग जोडिएको विधेयक भएको र मन्त्रीले नै भविष्यमा यस्तो नजिर नदोहोरिने कमिटमेन्ट (प्रतिबद्धता) गरेपछि पारित गरिएको हो ।”

योसँगै राष्ट्रियसभाको अर्को बैठक यही साउन १८ गते बिहीबार दिउसो १ बजेर १ मिनेटमा बस्ने गरी स्थगित गरिएको छ ।