काठमाडौं । नेकपा (माओवादी केन्द्र)का सांसद देवेन्द्र पौडेलले सरकारले भ्रटाचारका विषयमा छानबिन गरिरहेको भन्दै टाउको नदु्खाउन आग्रह गरेका छन् । आजको प्रतिनिधिसभा बैठकमा उनले कसैको अनुहार नहेरी कारबाही गर्न आग्रह गरे ।
“कसैको अनुहार हेर्न जरुरी छैन । सरकार अघि बढोस् । बाँकी रहेका उठेका कतिपय प्रश्नहरुको बारेमा पनि सरकारले छानबिन गरेर व्यक्तिको अनुहार हेर्ने होइन्,” उनले भने, “ उसको काम, तरिका, शैली, गल्तीलाई हेरेर राज्यलाई सुशासनको प्रत्याभूति दिने गरी अघि बढ्न अनुरोध गर्दछु ।”
उनले सुन प्रकरणमा दिउँसै रात पार्न खोजिएकालाई कारबाही गर्दा गृहमन्त्री र अर्थमन्त्रीमाथि कुरा उठाइएको दाबी गरे ।
“सरकारको जिम्मेवारी सम्हालिरहनु भएका गृहमन्त्री र अर्थमन्त्रीका विषयमा पनि केही कुरा उठे । सरकारलाई बधाई पनि दिन चाहन्छु । दिउँसै रात पार्न खोजिएको थियो । रातलाई दिउँसो बनाइँदै छ,” उनले भने ।
उनले सम्पत्ति शुद्धीकरणलगायतका विषयमा पनि छानबिन हुनुपर्ने बताए । सरकारले केही विषय उठाउन खोज्दा चिच्याएर नरोक्न आग्रह गरे ।
“सरकारले केही विषय उठाउन खोज्दा चिच्याएर, असहमति प्रकट गरेर, विरोध गरे । यस्ता क्रियाकलापलाई राज्यको तर्फबाट छानबिन गर्ने प्रक्रियामा अघि बढाउनुपर्ने कुरालाई रोक्छौँ भने कुन प्रकारको प्रत्याभूति नागरिकलाई दिन चाहन्छौँ,” उनले सोधे ।
सरकारले गर्न खोजेको कामलाई समर्थन गर्न आग्रह गरे । उनले आफैं रहेको जिल्लामा सहकारीले ठगी गरेको भन्दै घटानामा सहभागी दोषीलाई कारबाही गनुपर्ने बताए ।
“ठूला साना मान्छे होइन, दोषीलाई कारबाही गर्दा माननीयहरु खुसी हुनुपर्ने हो नि । सरकारको यो प्रयत्नलाई सलाम भन्न चाहन्छु,” उनले भने ।
