काठमाडौं । गुगलले बुधबार मासिक लगइन भएका दुई अर्ब प्रयोगकर्ताले ‘युट्युब सर्ट’ भिडियो हेरिरहेको बताएको छ । छोटो भिडियो सेयर गर्न मिल्ने प्लेटफर्म टिकटक र इन्स्टाग्रामको रिलको तुलनामा यो युट्युब सर्टले पनि विशेष स्थान पाएको संकेत हो ।

गुगलले सार्वजनिक गरेको यो संख्या गत वर्ष घोषणा गरेको १.५ अर्ब प्रयोगकर्ताभन्दा बढी हो ।

सन् २०२३ को दोस्रो त्रैमासिक रिपोर्टमा युट्युब एडबाट कम्पनीले ७.६७ अर्ब अमेरिकी डलर आम्दानी गरेको समेत जनाएको छ । कम्पनीले अब ३० सेकेण्डको स्किप गर्न नमिल्ने एड पनि ल्याउने भएको छ ।

कम्पनीले विज्ञापनबाहेक, अब वार्नर ब्रदर्स, म्याक्स एनएफएल लगायतसँग पनि सम्झौता गरिरहेको छ ।

कम्पनीले गत वर्ष युट्युब प्रिमियम र म्युजिकमा आठ करोड प्रयोगकर्ता पुगेको बताएको थियो । यस वर्षको अपडेट भने कम्पनीले सार्वजनिक गरेको छैन । गुगलले यो त्रैमासिकमा ७४.६ अर्ब आम्दानी गरेको छ जुन गत वर्षको ६९.७ भन्दा बढी हो ।