काठमाडौं । नेपाली कांग्रेसका नेता दिलेन्द्रप्रसाद बडूले पार्टीको केन्द्रीय कार्यसमिति बैठकमा महामन्त्री गगनकुमार थापाले प्रस्तुत गरेका कार्यक्रमको कार्यान्वयन हुनुपर्ने बताएका छन् । मंगलबार काठमाडौंमा आयोजित चियापान कार्यक्रममा उनले यस्तो बताएका हुन् ।

उनले केन्द्रीय समितिका एजेन्डा सही र व्यवस्थित रहेको बताए । महामन्त्रीले प्रस्तुत गरेका कार्यतालिका र कार्यक्रम संस्थाको कार्यक्रम मानेर कार्यान्वयनका लागि एकजुट हुनुपर्नेमा उनले जोड दिए ।

उनले महामन्त्री थापाले प्रस्तुत गरेका कार्यक्रम कार्यान्वयन भए पार्टी राम्रोसँघ अघि बढ्ने पनि बताए ।

“केन्द्रीय समितिका एजेन्डा सही छन्, व्यवस्थित रूपमा आएको छ । सबै एजेन्डामा सबैले आफ्ना विचार राख्न सक्ने समय भएन, त्यो भएको भए सबै एजेन्डामा सबैको विचार आउँथ्यो । समय सीमित भयो । लाइभ गर्ने कुरा नयाँ भयो । लाइभ गर्ने कुरा गलत भयो भन्न मिल्दैन । कुनै केन्द्रीय सदस्यले एजेन्डामा आफ्ना विचार व्यवस्थित ढंगले राख्ने वातावरण बन्यो,” उनले भने, “केन्द्रीय समितिमा कार्यतालिका र कार्यक्रम आएको छ महामन्त्रीमार्फत, यो सबैको एजेन्डा र कार्यक्रम हो । संस्थागत कार्यक्रम हो । यसको कार्यान्वयनको लागि पार्टीको संस्थागत र एकताबद्ध ढंगले जुट्नुपर्छ, यो अहिलेको आवश्यकता हो । यसले पार्टीमा नयाँ जीवन दिन्छ । यो अब महमन्त्रीको कार्ययोजना नभई संस्थाको रूपमा लिनुपर्छ । यसरी गए पार्टी निश्चित रूपमा अघि बढ्छ । पार्टीभित्र हाम्रो एकता छ, एकताबद्ध ढंगले जान्छौँ ।”

नेता बडूले केन्द्रीय समितिको बैठकमा सबै एजेन्डामा धारणा राख्नलाई समय पर्याप्त हुन नसकेको गुनासो गरे ।