काठमाडौं । नेपाली नागरिकलाई अमेरिका पठाइदिने भन्दै रकम ठगी र आपराधिक कार्य गरेको आरोपमा एकजना पक्राउ परेका छन् । अमेरिका पठाइदिने प्रलोभन देखाएर आपराधिक कार्यमा संलग्न रहेको आरोपमा ती व्यक्तिलाई पक्राउ गरिएको प्रहरीले जनाएको छ ।

पक्राउ पर्नेमा कास्कीको पोखरा महानगरपालिका–२७ का ३४ वर्षीय कमल तामाङ छन् । उनी काठमाडौं महानगरपालिका–८, गुह्वेश्वरीस्थित पञ्चकन्या मार्गमा डेरा गरी बस्दै आएका थिए । नेपाल प्रहरीको मानव बेचबिखन अनुसन्धान ब्युरोको टोलीले उनलाई नियन्त्रणमा लिएको हो ।

उनलाई आइतबार (हिजो) काठमाडौं–८ बाटै पक्राउ गरिएको ब्युरोका प्रवक्ता एवं एसपी नरहरि रेग्मीले जानकारी दिए ।

अवैधानिक बाटो हुँदै अमेरिका लैजाने भन्दै धेरै नेपालीलाई अन्यत्र देशमा लगी अलपत्र पार्ने, बन्धक बनाई यातना दिने र फिरौती लिनेजस्ता आपराधिक कार्यमा उनको संलग्नता देखिएको प्रहरीले जनाएको छ ।

अमेरिका लैजाने भन्दै मानव बेचबिखन तथा ओसारपसार अपराध गरेको कसुरमा तामाङलगायत व्यक्तिहरूविरुद्ध चारवटा जाहेरी दरखास्त परेको एसपी रेग्मीले बताए ।

उनका अनुसार हवाईमार्ग हुँदै अमेरिका लैजाने प्रलोभन देखाएर प्रतिव्यक्ति ११ लाख ३० हजारदेखि ६० लाख रुपैयाँसम्म असुल गरिएको थियो । यसरी आरोपितले विभिन्न व्यक्तिबाट दुई करोड २६ लाख २३ हजार ८९० रुपैयाँ लिएको देखिएको प्रहरीले जनाएको छ ।

नेपालबाट अमेरिका लैजाने भन्दै भारतको नयाँ दिल्ली, श्रीलंका, यूएई सिंगापुर, फिलिपिन्स, थाइल्यान्ड, लाओसलगायत देशहरूमा पुर्‍याई मानिसलाई अलपत्र पारिएको थियो । त्यसपछि थप रकम माग गर्ने गरेको समेत प्रहरी अनुसन्धानका क्रममा खुलेको एसपी रेग्मीले जानकारी दिए ।

यस्तो कार्यमा अधिकांश नेपाली नै संलग्न थिए । उनीहरू नेपाल र अरू देशहरूमा रहेर संगठित रूपमा परिचालित हुने गरेको प्रहरीको अनुसन्धानका क्रममा खुलेको छ ।

अमेरिका जाने भनी मानव ओसारपसारमा परेका पीडितले नै राहदानी, भिसा, हवाई टिकट, होटेल बुकिङलगायत खर्च व्यहोरेको देखिएको प्रहरीले जनाएको छ ।

प्रहरीका अनुसार अमेरिका लैजाने भन्दै गरिएको मानव ओसारपसारमा भिजिट भिसाको दुरुपयोग हुने गरेको खुलेको छ ।

यस्तो कार्यमा संलग्न अरू व्यक्तिहरूको खोजतलास र थप अनुसन्धान भइरहेको एसपी रेग्मीले जानकारी दिए ।