काठमाडौं । नेपालमा सञ्चालनमा रहेका विदेशी सशुल्क टेलिभिजन च्यानलहरुले आफ्नो मूल्यदर बुझाउन थालेका छन् । केही दिनअघि सूचना तथा प्रसारण विभागले आलाकार्ट शुल्क प्रणालीअनुसार आफ्नो टेलिभिजन च्यानल र बुकेको मूल्यसूची नबुझाउने च्यानललाई साउन १ गतेदेखि बन्द गर्ने भनेको थियो ।

सरकारको यो चेतावनीसँगै विदेशी सशुल्क च्यानलहरुले बुकेको मूल्यदर पठाउन थालेका हुन् ।

आलाकार्ट नमान्ने विदेशी च्यानल बन्द, २५० रुपैयाँमै निःशुल्क सबै हेर्न मिल्ने

विभागका निर्देशक एवं प्रवक्ता भरत गौतमले अहिले चार वटा विदेशी च्यानलले आफ्नो बुकेको मूल्य पठाएको बताए । यससँगै तत्काली विदेशी च्यानलहरुको प्रसारण बन्द नगरिएको र विस्तारै आलाकार्ट प्रणाली पूर्णरुपमा कार्यान्वयनमा आउने उनको भनाइ छ ।

“सुरुमा सबैले थाहा नपाएको पनि हुनसक्छ । अहिले चार वटा कम्पनीले आफ्नो मूल्यसूची विभागलाई पठाएका छन् । मन्त्रालयलाई पनि पठाएको होला । विस्तारै आलाकार्ट कार्यान्वयनमा आउँछ, प्रसारण रोकिएको छैन,” प्रवक्ता गौतमले भने ।

सूचना तथा प्रसारण विभागले असार २९ गते शुक्रबार एक विज्ञप्ति जारी गर्दै साउन १ देखि सबै सशुल्क विदेशी टीभी च्यानलको प्रसारणमा रोक लगाउने स्थिति सिर्जना भएको भनेको थियो ।

गत वर्ष २०७९ को चैत १५ मा सञ्चार तथा सूचना प्रविधि मन्त्रालयले उपभोक्ता र प्रसारक दुवैको हितमा हुनेगरी अन्य मुलकमा जसरी नै आलाकार्ट शुल्क प्रणाली लागु गर्ने निर्णय गरेको थियो ।

आलाकार्ट मूल्य प्रणालीमा उपभोक्ताले हेर्न चाहेको च्यानल वा बुके (च्यानलहरूको बन्डल)को मात्रै शुल्क तिर्नुपर्ने व्यवस्था गर्छ । सोहीअनुसार आलाकार्ट प्रणालीले निःशुल्क हेर्न मिल्ने सबै टीभी च्यानलहरू देखाएवापत सेवा प्रदायकले २५० रुपैयाँ लिनसक्ने व्यवस्था गरेको छ ।

नेपालमा लगभग सबै टीभी च्यानल निःशुल्क हेर्न मिल्ने छन् र विदेशी निःशुल्क च्यानल पनि यसै मूल्यमा हेर्न मिल्नेछ ।

निःशुल्क हेर्न मिल्ने बाहेकका सशुल्क टीभी च्यानलको हकमा च्यानलको बुके (बन्डल अथवा प्याकेज) बनाएर प्रतिबुकेको मूल्य बढीमा ४० रुपैयाँ तोक्न सकिने व्यवस्था मन्त्रालयले गरेको छ ।

यसरी टेलिभिजनको सेवा दिएवापत सेवा प्रदायकले मासिक बढीमा ५०० रुपैयाँ भन्दा बढी उठाउन पाउने छैन ।