काठमाडौं । एसीसी मेन्स इमर्जिङ एसिया कपमा नेपाली ब्याटर पाकिस्तानी बलरसामु निरीह बनेका छन् ।

श्रीलंकाको राजधानी कोलम्बोस्थित कोलम्बो क्रिकेट क्लब मैदानमा जारी खेलमा टस जितेर ब्याटिङमा उत्रिएको नेपाली टिमले १९ ओभरको समाप्तिमा ९१ रन जोड्दा आठ विकेट गुमाइसकेको छ । 

सुरुआतदेखि नै धराशायी बनेको नेपाली इनिङ्समा कुनै पनि ब्याटरले उल्लेख्य प्रदर्शन गर्न सकेनन् । नेपालका लागि अर्जुन साउद र कुशल मल्लले समान १७ रन जोडे ।

गुल्सन झाले १३, ओपनर आसिफ शेखले १२ र हाल क्रिजमा रहेका सोमपाल कामीले ११ रन बनाउनुबाहेक अरू खेलाडीले दोहोरो अंकमा रन बनाउन सकेनन् । सोमपालसँगै हाल क्रिजमा रहेको प्रतिश जिसी पाँच रनमा खेलिरहेका छन् ।

नेपालका कप्तान रोहितकुमार पौडेलले चार, कुशल भुर्तेल र पवन सर्राफ समान एक रनमा आउट भए । भीम सार्की डकआउट भए ।

पाकिस्तानका साहनवाज दाहानी र मोहम्मद वसिमले समान चार विकेट लिएका छन् ।

प्रतियोगितामा नेपाल र पाकिस्तान दुवैको यो पहिलो खेल हो । नेपालले साउन १ गते भारत ‘ए’सँग दोस्रो खेल खेल्नेछ । नेपाली टिमले साउत ३ गते समूह चरणको अन्तिम खेलमा यूएई ‘ए’विरुद्ध प्रतिस्पर्धा गर्नेछ ।

समूहबाट शीर्ष दुई टिम सेमिफाइनलमा प्रवेश गर्नेछन् । सेमिफाइनल खेलहरू साउन ५ र फाइनल साउन ७ गते हुनेछ ।

प्रतियोगितामा नेपालसहित एसियाका आठ टिम सहभागी छन् । सहभागी टिमलाई दुई समूहमा विभाजन गरिएको छ । प्रतियोगिताको समूह ‘ए’मा ओमान, अफगानिस्तान, बंगलादेश र श्रीलंका छन् । समूह ‘बी’मा नेपाल, भारत, पाकिस्तान र युनाइटेड अरब इमिरेट्स (यूएई) छन् ।

प्रतियोगितामा नेपालबाहेक सबै टिमले ‘ए’ टोली पठाएका छन् ।