पोखरा । पोखरा महानगरपालिकाले पृथ्वीचोकदेखि विजयपुर खोलासम्म पृथ्वी राजमार्गको दायाँबायाँ मापदण्डभित्रका संरचनामा डोजर चलाएको छ ।

पृथ्वी राजमार्गअन्तर्गत मुग्लिङ–पोखरा सडकखण्ड हाल दुई भागमा विस्तार कार्य गरिँदै छ । सडक विस्तारकै लागि राजमार्गको दायाँबायाँ पर्ने २९ मिटरभित्रका संरचनामा महानगरले डोजर चलाएको हो ।

महानगरका मेयर धनराज आचार्यले हिजो (आइतबार) नै फेसबुकमा स्टाटस लेखेर सोमबारदेखि ती संरचना हटाउन सुरु गरिने बताएका थिए । उनका अनुसार मापदण्डभित्र परेका संरचना हटाउन एक महिनाअघि नै सूचना जारी गरिएको थियो । तर, अटेरी गरिएकाले डोजर चलाउनुपरेको हो । स्थायी र अस्थायी गरी तत्काल ६० संरचना हटाइने उनले जानकारी दिए ।

दातृनिकाय एडीबीले यो सडकमा लगानी गरेको छ । सडकको अवस्था बुझ्नका लागि एडीबीको टिम आउनुअगावै राजमार्गको ‘राइट अफ वे क्लियर’ गर्न थालिएको मेयर आचार्यको भनाइ छ । उनका अनुसार एडीबीको टिम बुधबार पोखरा आउँदै छ ।

विजयपुरदेखि लेखनाथ क्षेत्रमा मुआब्जाको विषय टुंगिन बाँकी रहेकाले त्यहाँका संरचना हटाउन केही समय लाग्ने उनले बताए ।