काठमाडौं । जिम्बावेमा भएको आईसीसी विश्वकप छनोट खेलेर राष्ट्रिय क्रिकेट टिम स्वदेश फर्किएको छ ।

शुक्रबार स्वेदश फर्किएको राष्ट्रिय क्रिकेट टिमलाई त्रिभुवन अन्तर्राष्ट्रिय विमानस्थलमा नेपाल क्रिकेट (संघ क्यान)का कोषाध्यक्ष रोशनबहादुर सिंहलगायत पदाधिकारीले स्वागत गरेका थिए । छनोटको आठौं स्थानमा रहेको नेपाल समूह चरणमा जिम्वाबेसँग, वेस्ट इन्डिजसँग, नेदरल्यान्ड्ससँग पराजित हुँदा अमेरिकालाई मात्र हराएको थियो । 

यस्तै, सातौं स्थानको प्लेअफमा नेपालले यूएईलाई हराउँदा आयरल्यान्डसँग पराजित हुँदै आठौं स्थानमा प्रतियोगिता टुंग्याएको थियो ।

स्वदेश फर्केपछि विमानस्थलमा सञ्चारकर्मीसँग नेपाली टिमका कप्तान रोहितकुमार पौडेलले विश्वकप छनोटमा सोचेअनुसारको नतिजा नआए पनि धेरै अनुभव प्राप्त भएको बताए । 

“सोचजस्तो नतिजा आएन । तर, धेरै कुरा सिक्न पायौं । विशेषगरी टेस्ट राष्ट्रसँग खेल्न पाउँदा नयाँ अनुभव संगाल्ने मौका पायौँ । उनीहरूसँगको प्रतिस्पर्धा नै राम्रो थियो । टेस्ट टिमलाई जित्न मलाई लाग्छ सबै क्षेत्रमा राम्रो गर्नुपर्छ । तर, हामीले हरेक दिन एक कुरा मिस गरिरहेका थियौं । अब आउने प्रतियोगिताहरूमा त्यस कुरालाई सुधार गर्नेछौं,” रोहितले भने ।