काठमाडौं । प्लानिङ ब्वाइज युनाइटेड शीर्ष डिभिजन लिगमा बढुवा भएको छ । प्लानिङ दुई खेलअगावै सहिद स्मारक ‘बी’ डिभिजन लिगबाट शीर्ष डिभिजन लिगमा बढुवा भएको हो ।

मंगलबार ११औँ चरणमा बाँसबारीविरुद्ध २–० जित निकाल्दै लिगमा २७ अंकका साथ प्लानिङले ‘ए’ डिभिजन यात्रा तय गर्‍यो । प्लानिङले शीर्ष डिभिजन बढुवाका निम्ति ११ खेलमा तीन बराबरी र आठ जित निकाल्यो ।

जितका निम्ति प्लानिङले झापा फुटबल क्लबलाई २–१, च्यासल युथ क्लबलाई ४–०, मध्यपुर युथ एसोसियसनलाई २–०, ब्वाइज युनियन क्लबलाई २–१, सरस्वती युथ क्लबलाई ३–०, रानीपोखरी कर्नर टिम (आरसिटी) लाई १–० र बाँसबारी क्लबलाई ३–० ले पराजित गर्‍यो । त्यसैगरी ब्रिगेड ब्वाइज क्लबसँग गोलरहित, श्री भगवती क्लब टोखासँग १–१ र श्री कुमारी क्लबसँग १–१ को बराबरी खेलेको थियो ।

प्लानिङ ब्वाइज नेपाली डिभिजन लिगमा पाइला टेकेको १४ वर्षपछि शीर्ष डिभिजन लिगमा बढुवा भएको हो । २०६८ मा ‘सी’ डिभिजन क्वालिफार्यसमा छनोट हुँदै टोली ‘सी’ डिभिजन लिग तय गरेको थियो ।

प्लानिङ ब्वाइजले २०६९ मा ‘सी’ डिभिजनमा प्रतिस्पर्धा गरेको थियो । यसको १० वर्षपछि २०७९ मा सम्पन्न ‘सी’ डिभिजन लिगमा उपविजेता बन्दै टोली झापा फुटबल क्लबसँगै ‘बी’ डिभिजन लिगमा बढुवा भएको थियो । यो तहबाट बढुवा भएको तीन वर्षको अन्तरालमा टोली शीर्ष डिभिन लिगमा बढुवा भएको हो ।

सोमबार आठौँ जितमा प्लानिङलाई जित दिलाउन टोलीका सुजन थापाले गोल गरे । उनले फ्रिकिकमार्फत गोल गरेका थिए । यस्तै, प्लानिङले अर्को एक गोल भने बाँसबारीका खेलाडीबाट आत्मघाती उपहार पाएको थियो ।