काठमाडौं । बेलायतका र्यान पेनिस्टोनलाई हराउँदै एन्डी मुरेले विम्बल्डनको पहिलो चरणमा अपराजित यात्रालाई कायम राखेका छन् । 

दुई पटकका विजेता मुरेले वाइल्डकार्डमार्फत आएका पेनिस्टोनविरुद्ध सुस्त सुरुआत गरेका थिए । सेन्टर कोर्टमा पहिलो सेट ६–३ ले जितेका मुरेले दोस्रो सेट ६–०, तेस्रो सेट ६–१ ले आफ्नो पक्षमा पारे । 

पेनिस्टोनविरुद्ध मुरेले सन् २०१४ पछिकै सबैभन्दा सहज जित निकालेका हुन् । उनले यसअघि विम्बल्डनको सन् २०१४ को संस्करणमा स्लोभानियाका ब्लाज रोलाविरुद्ध ६–१, ६–१, ६–० को जित निकालेका थिए । जितपछि पूर्वविश्व नम्बर एक मुरेले पछिल्लो समय शारीरिक र मानसिक रूपमा तयार रहेको बताए ।

यस्तै, १२औँ स्थानका बेलायती टेनिस स्टार क्यामेरोन नोरीले पनि टोमस माहाकलाई हराउँदै दोस्रो चरणमा स्थान पक्का गरे । नोरीले माहाकविरुद्ध ६–३, ४–६, ६–१, ६–४ ले हराउँदै दोस्रो चरणको यात्रा तय गरेका थिए ।