काठमाडौं । आईसीसी क्रिकेट विश्वकप छनोटको सुपर सिक्समा स्कटल्यान्डले वेस्ट इन्डिजलाई सात विकेटले हराएको छ । 

शनिबार जिम्बाब्वेको हरारेस्थित हरारे स्पोर्ट्स क्लबमा दुईपटकको एकदिवसीय विश्वकप विजेता वेस्ट इन्डिजले प्रस्तुत गरेको १८२ रनको लक्ष्य स्कटल्यान्डले ४३.३ ओभरमा तीन विकेट गुमाएर पूरा गर्‍यो ।

स्कटल्यान्डको जितमा म्याथ्यु क्रसले अविजित ७४ रन बनाए । ब्रान्डन म्याकमुलमले ६९, जर्ज मुन्सेले १८ र कप्तान रिची बेरिङ्टनले १३ रन जोडे ।

वेस्ट इन्डिजका जासन होल्डर, रोमारियो सेफर्ड र अकेइल हुसैनले समान एक विकेट लिए ।

त्यसअघि, टस हारेर ब्याटिङमा उत्रिएको वेस्ट इन्डिजले ४३.५ ओभरमा सबै विकेट गुमाएर १८१ रन बनाएको थियो ।

वेस्ट इन्डिजका जासन होल्डरले ४५ रनको योगदान गरे । रोमारियो सेफर्डले ३६, ब्रान्डन किङले २२, निकोलस पुरनले २१ र केभिन सिनक्ल्याइरले १० रन जोडे ।

स्कटल्यान्डका ब्रान्डन म्याकमुलमले तीन विकेट लिए । क्रिस सोल, मार्क वाट र क्रिस ग्रेभेसले समान दुई विकेट लिए ।

छनोटको सुपर सिक्समा जिम्बाब्वे र ओमानसँगै वेस्ट इन्डिज, श्रीलंका, स्कटल्यान्ड र नेदरल्यान्ड छन् । सुपर सिक्सबाट शीर्ष दुई टिमले यसै वर्ष भारतमा हुने एकदिवसीय विश्वकपमा स्थान बनाउनेछन् ।