काठमाडौं । कृषि तथा पशुपक्षी विकासमन्त्री डा. वेदुराम भुसालले यो वर्ष धान रोपाइँका लागि रासायनिक मलको अभाव नहुने बताएका छन् । मंगलबार प्रतिनिधिसभा बैठकमा उनले यस्तो बताएका हुन् ।

हाल देशभरका कृषि सामग्री कम्पनी र साल्ट ट्रेडिङ कर्पोरेसनका डिपोहरूमा ७८ हजार ४२२ मेट्रिक टन मल मौज्दात रहेको उनले जानकारी दिए । यो असारको अन्त्यसम्ममा थप ४५ हजार मेट्रिक टन र साउनभित्र थप ७५ हजार मेट्रिक टन रासायनिक मल प्राप्त हुने उनले बताए ।

मन्त्री भुसालले आउँदो आर्थिक वर्षका लागि रासायनिक मल खरिदका निम्ति ३० अर्ब रुपैयाँ रकम सुनिश्चित गरिएको जानकारी दिए ।

लम्पी स्किन रोग नियन्त्रणका लागि सम्भव भएसम्मका काम अगाडि बढाइएको उनले बताए । सो रोगका कारण हालसम्म ६ लाख ११ हजार २०९ पशु संक्रमित र २१ हजार ४७३ को मृत्यु भइसकेको उनले जानकारी दिए ।

तीन लाख ५४ हजार ५७३ पशु लम्पी स्किन रोगबाट निको भएको पनि उनले बताए । उनका अनुसार दुई लाख ३५ हजार २१९ पशु अझै पनि संक्रमित अवस्थामा छन् ।

लम्पी स्किन रोगविरुद्धको खोप जोर्डन, तान्जानिया र टर्कीबाट आयात गरिरहेको उनले बताए । हालसम्म सात लाख ३७ हजार डोज सो खोप ल्याइएको उनले उल्लेख गरे । असार १० गतेसम्म एक लाख ६२ हजार ३७१ पशुलाई खोप लगाइएको उनले जानकारी दिए ।