काठमाडौं । रुसी राष्ट्रपति भ्लादिमिर पुटिनले गएको शनिबार भएको विद्रोहमा मारिएका पाइलटप्रति श्रद्धाञ्जली अर्पण गरेका छन् ।

शनिबारको घटनापछि पहिलो सार्वजनिक सम्बोधनमा पुटिनले वाग्नर ग्रुपले रुसी सेनाको लडाकु जहाज खसालेको पुष्टि गर्दै पाइलटले देखाएको देशभक्तिको सम्मान गरेका छन् ।

‘फादरल्यान्ड’को रक्षा गर्न एकजुट भएकामा रुसी जनता, सेवाकर्मी, सुरक्षा निकायलाई धन्यवाद दिँदै पुटिनले रुस ‘कुनै पनि ब्ल्याकमेल वा आन्तरिक उथलपुथल सिर्जना गर्ने प्रयास’मा नझुक्ने बताएका छन् ।

उनले रुसका शत्रुले देशलाई रक्तपातपूर्ण गृहयुद्धमा फसेको हेर्न चाहेको टिप्पणी गरेका छन् । विमानका पाइलटको गौरवपूर्ण कदमले त्यसो हुनबाट जोगाएको भन्दै उनले रुसको अस्तित्वलाई खतरामा पार्न खोज्नेलाई सजाय दिने बताएका छन् ।

त्यसक्रममा कति पाइलटको मृत्यु भयो वा कति विमान खसालियो भन्नेबारे आधिकारिक जानकारी गराइएको छैन । तर, त्यो दिन १३ पाइलट मारिएको सूचना सार्वजनिक भएको थियो ।

वाग्नर नेता प्रिगोजिनले आफ्नो प्रेस सेवाको टेलिग्राम च्यानलमा ११ मिनेटको अडियो सन्देश पोस्ट गर्दै मस्कोको सत्ता ढाल्ने आफूहरूको उद्देश्य नरहेको बताएका छन् । उनले रुसी सेनाले वाग्नरमाथि आक्रमण गरेको र आफ्नो सेनालाई सरकारी सेनामा मिसाउन खोजेको भन्दै असन्तुष्टि जनाएका थिए । रोयटर्सबाट ।