काठमाडौं । आईएमई ग्रुपअन्तर्गत सञ्चालित केबलकार कम्पनीहरू चन्द्रागिरि हिल्स, मौलाकाली केबलकार र लुम्बिनी केबलकारले सशस्त्र प्रहरी र आश्रित परिवारहरूलाई टिकट मूल्यमा छुट दिने भएका छन् ।

बिहीबार सशस्त्र प्रहरी बलको प्रधान कार्यालयमा तीनवटै केबलकार कम्पनीहरुले छुट प्रदान सम्बन्धी सम्झौता भएको हो । सम्झौताअनुसार बहालवाला सशस्त्र प्रहरी कर्मचारी, अवकाशप्राप्त सशस्त्र प्रहरी कर्मचारी, आश्रित परिवारका साथै नेपाल एपीएफ स्कुलमा कार्यरत शिक्षक तथा कर्मचारीहरुले केबलकारको टिकट मूल्यमा २० प्रतिशत छुट प्राप्त गर्नेछन् ।

छुट प्राप्त गर्न बहालवाला सशस्त्र प्रहरी कर्मचारीहरूले सम्बन्धित कार्यालयले प्रदान गरेको परिचयपत्र, अवकाश प्राप्त सशस्त्र प्रहरी कर्मचारीहरूले पेन्सन पट्टा र आश्रित परिवारहरूले नाता प्रमाणित कागजात देखाउनु पर्नेछ ।

सम्झौतापत्रमा सशस्त्र प्रहरी वरिष्ठ उपरीक्षक प्रविण कडेल र मौलाकाली तथा लुम्बिनी केबलकारका तर्फबाट कम्पनीका प्रतिनिधि रुद्र पौडेल, चन्द्रागिरि हिल्सका तर्फबाट महाप्रबन्धक संजिव थापाले हस्ताक्षर गरेका हुन् ।