काठमाडौं । गएको शुक्रबार (असार १) नेपालमा पहिलोपटक पुष्टि भएको मंकीपक्स (एमपक्स) संक्रमण ११२ देशमा फैलिइसकेको छ ।
नेपालमा विदेशी नागरिकमा मंकीपक्स पुष्टि भएको हो । ६० वर्षीया नेदरल्यान्ड्सकी नागरिकमा एमपक्स पुष्टि भएको स्वास्थ्य तथा जनसंख्या मन्त्रालयले जनाएको छ ।
मन्त्रालयका अनुसार राष्ट्रिय जनस्वास्थ्य प्रयोगशालामा गरिएको परीक्षणपछि उनमा असार १ गते एमपक्स पुष्टि भएको थियो । दक्षिण अफ्रिकी मुलुक बुरुन्डीबाट उनी एमपक्स र डेंगीको लक्षणसहित नेपाल आइपुगेकी थिइन् ।
भाइरसबाट हुने मंकीपक्स एक किसिमको सरुवा रोग हो । हाल यो संक्रमण विश्वव्यापी चासोको जनस्वास्थ्य आपत्कालको अवस्थामा भने नरहेको मन्त्रालयले जनाएको छ ।
ज्वरो आउनु, सामान्यतया ज्वरो सुरु भएको एकदेखि तीन दिनभित्र छाला, अनुहार, हत्केला र पैतालामा डाबर देखापर्नु, सो डाबर परिवर्तन भई फोका हुँदै पाप्रा लागेर उप्किनु, टाउको, ढाड र मांसपेशी दुख्नु र शरीरका ग्रन्थीहरू बढ्नु मंकीपक्स रोगका लक्षण हुन् ।
कोही व्यक्तिमा मंकीपक्ससित मिल्दोजुल्दो लक्षण देखिए अस्पताल गई चिकित्सकको सल्लाह लिन मन्त्रालयले आग्रह गरेको छ । मन्त्रालयको कल सेन्टर १११५ वा ११३३ मा सम्पर्क गरेर पनि परामर्श लिन सकिने जनाइएको छ ।
-1706524096.JPG)
