कठमाडौं । प्रधानमन्त्रीसमेत रहेका नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले समाजवादी मोर्चा 'प्रतिक्रान्तिकारी र प्रतिगमनकारीहरूविरुद्ध युद्ध'को घोषणा भएको बताएका छन् ।

सोमबार समाजवादी मोर्चा घोषणा सभालाई सम्बोधन गर्ने क्रममा अध्यक्ष दाहालले मोर्चा 'प्रतिगमनकारी विरुद्धको युद्ध' घोषणा भएको बताएका हुन् । 

“वामपन्थी, अग्रमनकारी र क्रान्तिकारीहरू यस मोर्चाबाट डराउन जरुरी छैन,  आउनुस् हात मिलाऔँ । यस देशलाई अघि बढाउने संकल्प गरौँ,” प्रचण्डले भने, “झण्डै ७५ वर्षदेखिको संघर्ष र बलिदानलाई बलिदान र त्यसको उपलब्धिलाई बदनाम गर्न खोज्ने केही मान्छेहरूले टाउको उठाउन खोजेका छन् । यो मोर्चा तिनका विरुद्ध युद्धको घोषणा हो ।”

उनले जेलनेल र बलिदान गरेर ल्याएका उपलब्धिका विरुद्ध लाग्नेहरूका लागि मोर्चा अभियान र युद्ध दुवै भएको बताए । उनले परिवर्तनका लागि संघर्ष गरेकाहरूलाई होच्याउनेविरुद्ध मोर्चा बनेको बताए ।

“प्रतिक्रान्तिकारीहरूका विरुद्ध, प्रतिगमनकारीका विरुद्ध यो मोर्चा हो, हिजो सामन्ती व्यवस्था कस्तो थियो । त्यसकाविरुद्ध संघर्ष गरेर आएकाहरूलाई हियाउनेहरू विरुद्ध उभिनुपर्छ, उभिन्छौँ,” उनले भने, “आउनुहोस् परिवर्तनकामीहरू मोर्चाबद्ध भएर सहकार्य गरौँ । परिवर्तन विरोधी गतिविधिका विरुद्ध एक भएर प्रतिवाद गरौँ ।”

प्रधानमन्त्री पदमा बहाल रहेका प्रचण्डले सत्तामा र सडकमा एकसाथ संघर्ष गर्ने पनि बताए ।