काठमाडौं । सभामुख देवराज घिमिरे सोमबार प्रतिनिधिसभा बैठकमा अलमलमा परे ।

सभामुख घिमिरेले प्रतिनिधिसभा बैठकको शून्य समय सकिएको जनाएपछि स्वतन्त्र सांसद योगेन्द्र मण्डलले उठेर नियमापत्ति जनाएका थिए । आफूले शून्य समयमा बोल्न नपाएकोप्रति संकेत गर्दै उनले नियमापत्ति गरेका थिए ।

“पूरा कन्फ्युज छु सभामुख महोदय ! मैले एक कक्षामा पढेको थिएँ, मेरो गुरुले पढाउनुभएको थियो– म बाट य आउँछ र हैन ल हैन । यहाँ त मैले पढेको गलत हो कि अरूले पढेको बिर्सिए कि गलत पढेको हो ? यो जवाफ चाहियो,” सांसद मण्डलले भने ।

सभामुख घिमिरेले मण्डलको सांकेतिक नियमपात्ति नै बुझेनन् । उनले संसद् सचिवालयका कर्मचारीलाई ‘के भनेको ?’ भनेर सोधे र छलफल गरे । एक छिन सदनमा मौनता छाएपछि सभामुख बोल्न थाले ।

“शून्य समयमा बोल्ने माननीयहरूले आफ्नो नाम टिपाउने व्यवस्था छ । माननीय योगेन्द्र मण्डलले आपत्ति राख्दा मेरो नाम आएन भनेको बुझ्यौँ । उहाँको नाम आजको कार्यसूचीभित्र त छ, तर उहाँले बोल्नेमा नाम टिपाउनुभएको छैन,” सभामुख घिमिरेले भने, “हामीले गरेको व्यवस्थाअन्तर्गत कहाँ के कुरा मिलेन, त्यसलाई बसेर मिलाउने कुरामा माननीयज्यूहरूको भूमिका रहनुपर्नेछ । लागेको बेला दोहोरो छलफल गरेर नियमावली कार्यान्वयनमा अलि सहयोग पुग्दैन होला भन्ने कुरामा ध्यानाकर्षण गराउँछु ।”

टिपाएका नामहरू प्राविधिक कारणवश छुट्न सक्ने उनले बताए । तर, आजको बैठकको शून्य समयमा बोल्न मण्डलले नाम नटिपाएको जानकारी पनि उनले दिए ।