काठमाडौं । सञ्चार तथा सूचना प्रविधिमन्त्री रेखा शर्माले प्रविधिको सही प्रयोग गर्न नसक्दा साइबर अपराधका घटना बढेको बताएकी छन् ।

बिहीबार ललितपुरमा आयोजित नेपाल मोबाइल व्यवसायी महासंघको दोस्रो साधारणसभालाई सम्बोधन गर्दै उनले प्राविधिक शिक्षाको कमी हुँदा कतिपय युवाहरु बर्बादीको शिकार भइरहेको बताइन् ।

साइबर शिक्षा र डिजिटल माध्यमको प्रयोगसम्बन्धी शिक्षा दिन नसक्दा समस्या बढिरहेको भन्दै उनले सामाजिक सञ्जालको दुरुपयोगका कारण आत्महत्या गर्नुपर्ने स्थिति समेत हुने गरेको बताइन् । यसलाई समयमा नै नियन्त्रण र यससम्बन्धी शिक्षा दिन आवश्यक रहेको उनको भनाइ छ । 

सूचना र प्रविधिमा हुने विकृतिका कारण युवापुस्ताहरु भड्किरहेको बताउँदै उनले नेपालमा साइबर सुरक्षा नीति नभएकाले वर्तमान सरकारले त्यससम्बन्धी काम गरिरहेको स्पष्ट पारिन् । डिजिटल शिक्षालाई जनस्तरमा पु¥याउनसके सूचना र प्रविधिसम्बन्धीका धेरै समस्या समाधान हुने उनले बताइन् ।

“हामीसँग साइबर सुरक्षा नीति छैन । यसको अन्तिम तयारीमा हामी छौँ । डिजिटल शिक्षालाई व्यापक रुपमा लैजान सकेका छैनौँ,” उनले भनिन्, “मोबाइलको विकाससँगै त्यो शिक्षालाई पनि अघि बढाउनुपर्छ ।”

मन्त्री शर्माले मोबाइलको विकाससँगै प्राविधिक शिक्षालाई पनि जनस्तरमा पु¥याउन जरुरी रहेको बताइन् ।