काठमाडौं । कुनै पनि पहिरनको छनोट आफू सुहाउँदो गर्नुपर्छ । पहिरनले सहज महसुस गर्नुपर्छ । जथाभावी भद्दा पहिरनले मानिसको व्यक्तित्वमै नकारात्मक असर गर्न सक्छ ।

आफूलाई हिँड्न, बस्न, काम गर्न सहज हुने पहिरनतर्फ ध्यान दिनुपर्छ । यस्तो पहिरनले मानिसको आत्मविश्वास बढाउँछ । अर्थात्, पहिरनका कारण कुनै किसिमको झन्झट व्यहोर्नु पर्दैन । कतै जाँदा आफूलाई फिट र सुहाएको पहिरन लगाएको छ भने बेग्लै आत्मविश्वास बढ्ने गायिका इन्दिरा जोशी बताउँछिन् ।

तर, नेपालमा हलिउड, बलिउडका कलाकारले लगाएका, सामाजिक सञ्जालमा देखिएका तस्बिरका आधारमा त्यस्तै पहिरन लगाउन खोज्नेहरूको संख्या बाक्लै छ । त्यो गलत च्वाइस भएको इन्दिरा बताउँछिन् ।

उनी भन्छिन्, “कसैलाई सुहाएको पहिरन, डिजाइन र कलरहरू अर्कोलाई पनि सुहाउँछ भन्ने हुँदैन । कतिपय ट्रेन्डमा रहेका फेसन पनि सबैलाई सुहाउँछ भन्ने हुँदैन ।”

आफ्नो फिगर, स्किन टोन, समय र कामअनुसारको पहिरन छनोट गर्नुपर्नेमा उनी जोड दिन्छिन् । इन्दिरा फेसेनेबल गायिकाका रूपमा समेत परिचित छिन् । गीतमा जस्तै उनी आफ्नो आउट फिटको मामिलामा पनि उत्तिकै सजग हुन्छिन् ।

पहिलेपहिले आङ ढाक्न लगाउने पहिरन अहिले ‘खाएको देखिन्न, लाएको देखिन्छ’ भन्दै यसमा सम्झौता नगर्ने मानिस धेरै छन् । बदलिँदो समयसँगै पहिरन आफैँमा सौन्दर्यदेखि, आत्मविश्वासको कडी तथा सन्देश समेत बन्दै गएको छ ।

पहिलेपहिले विवाह, अरू पार्टी तथा चाडपर्वमा मान्छे नयाँ–नयाँ आभूषणमा सजिन रुचाउँथे । तर, अहिले दिनहुँ युवा जमात मात्र नभई कामकाजी महिला, गृहिणी, पुरुषहरू समेत आकर्षक गेटअपमा हिँडेको देखिन्छ ।

अहिलेको पुस्ता देखिन र देखाउन चाहन्छ । जसरी भए पनि आकर्षक र फरक देखिने चाह उनीहरूमा हुन्छ । अहिलेको पुस्ता अर्थात् टीनएजर केपपका फ्यान छन्, कोरियन सिनेमा, संगीत र फेसनले पनि नेपालको किशोर पुस्तालाई लोभ्याइरहेको छ, बाँकी विश्वलाई झैँ ।

सन् १९९० को दशकपछि आफ्नो बेग्लै लुक्स, फिल र स्टाइलका कारण कोरियन पपले लोकप्रियता पायो । सन् २००० बाट के–पपको क्रेज चुलियो । उनीहरूकै सिको गरेर हिँड्न खोज्ने थुप्रै छन् ।

मानिसमा स्मार्ट र सुन्दर देखिने चाहनासँगै पहिरनका शो रुमहरूमा पनि विविधता देखिन्छ । त्यस्ता शो रुममा क्याजुअल, रेडिमेड र डिजाइनर वेयर छ्यापछ्याप्ती भेटिन्छ । अहिले रेडिमेड पहिरन टिनएजप्रति लक्षित छ । बुटिकमा प्लस २५ लाई लक्षित गरी पहिरन डिजाइन गरिएको पाइन्छ ।

कुनै समय सम्भ्रान्त परिवारका सदस्यले मात्र प्रयोग गर्ने बुटिकका पहिरन अहिले आममानिसको रोजाइमा परिसकेको छ । मुलुकभर बुटिक व्यवसाय फस्टाउँदै गएको छ । बढ्दो प्रतिस्पर्धासँगै आमउपभोक्तालाई समेत ध्यानमा राखेर मूल्य निर्धारण गर्न थालिएको छ ।

शरीर सुहाउँदो पहिरन तयार गरिने हुँदा पनि बुटिक धेरैको रोजाइमा पर्ने गरेको फेसन डिजाइनर मोनिमा जोशी बताउँछिन् ।

अहिले कुपन्डोलमा मात्र सयभन्दा बढी बुटिक छन् । कुपन्डोललाई बुटिकको हब पनि भनिन्छ । दरबारमार्ग, न्युरोड, नक्साल, भाटभटेनी, नयाँ तथा पुरानो बानेश्वर, महाराजगन्ज, पानीपोखरी, लाजिम्पाट, जाउलाखेललगायत स्थानमा बुटिकको संख्या बढ्दो छ । काठमाडौं उपत्यकामा सानाठूला बुटिकको संख्या ४०० भन्दा बढी भइसकेको बताइन्छ ।

आफू सुहाउँदो पहिरन अपनाउनुपर्ने फेसन डिजाइनर रमिला नेमकुलको सुझाव छ । उनी भन्छिन्, “यसले फेसनेबल देखाउनुका साथै अरूभन्दा फरक देखाउँछ ।”

फेसन सहज किसिमको र समयानुकूल समेत हुनुपर्नेमा उनी जोड दिन्छिन् । “स्टाइलिस देखिनका लागि पहिरनको संयोजनमा भने उचित ध्यान दिनुपर्छ,” उनी भन्छिन्, “हरेक सिजनमा उही परिहन शैली पुनरावृत्ति हुन्छ ।”

हरेक वर्ष एकदमै नयाँ र पृथक् शैलीको फेसन चल्छ भन्ने हुँदैन । गएको सिजनमा चलेको पहिरनमा थोरै मोडिफाई मात्र पनि हुन सक्ने उनी बताउँछिन् ।

नेपालमा भौगोलिक स्थितिअनुसार फरक–फरक प्रकारका पोसाक लगाइन्छ । हिमालमा बख्खु, दोचा लगाइन्छ । पहाडमा दौरा–सुरुवाल, चोलो–धोती लगाइन्छ । तराईमा फरिया, जामा, धोती र भेस्ट लगाइन्छ ।

“ती भौगोलिकअनुसारका पहिरनहरूलाई पनि दैनिक रूपमा लगाउन मिल्ने डिजाइन गर्ने सक्यौँ भने हाम्रा पहिरनहरू पनि अन्तर्राष्ट्रिय बजारले रुचाउन सक्छ,” लन्डनमा करियर अगाडि बढाइरहेकी फेसन डिजाइनर संयुक्ता श्रेष्ठ बताउँछिन् ।

फेसन ट्रेन्ड कस्तो चल्दै छ भन्ने कुरा मुख्यतः मौसमले तय गर्छ । जसरी मौसम परिवर्तन हुन्छ, त्यसैगरी फेसन ट्रेन्ड पनि फेरिँदै जान्छ । जस्तो, जाडोमा गाढा रङको न्यानो पहिरन, गर्मीमा उज्यालो रङको हल्का र खुला अनि वर्षामा रंगीर र वाटर प्रुफ । कतिपय फेसन ट्रेन्ड कहिल्यै पुरानो हुँदैन, सदाबहार चल्छ । जुनसुकै समयमा पनि लगाउन सकिन्छ । जसमा जिन्स र सारीलाई लिन सकिन्छ । जिन्सका कतिपय ट्रेन्ड भने निश्चित समयसम्म चलेको र हराएको उदाहरण छ ।

फेसन डिजाइनर तेन्जिङ छेतेन भुटियाका अनुसार सन् २०२३ को फेसन कलर ट्रेन्डमा सुन्तला, नियोन ग्रीनका साथमा चहकिला रङहरू छन् । पृथ्वी र जैविक तत्त्वसँग मेल खाने रङका रूपमा सुन्तला–खैरो टोन पनि फेसनमा छ । योपटक लुज पाइजामा स्टाइलका पाइन्ट, फ्लेरी ड्रेसेस फेसनमा छ । फिटेट पहिरन खासै फेसनमा छैन ।

इभेन्टमा लगाइने गाउनहरूमा योपटक इम्ब्रोडरी, एकभन्दा बढी कलरको कम्बिनेसन आउट भएको छ । कान्स फिल्म फेस्टिभल हेर्दा अधिकांश महिला सेलिब्रिटी गाउनमा पूरै एउटै कलर र कपडालाई नै प्रयोग गरेर ¥याप, ड्रयाप गरेका गाउनहरूमा देखिएका थिए ।