विराटनगर । पहाडी क्षेत्रमा स्वास्थ्य पहुँच बढाउनको लागि शिक्षण जिल्लाको रुपमा विकास गर्न माग गरिएको छ ।

नेपाली कांग्रेसकी प्रदेशसभा सदस्य इन्दिरा थापाले कतिपय निजी मेडिकल कलेजले केही जिल्लालाई शिक्षण जिल्लाको रुपमा प्रयोग गर्दै आएकोले अब बीपी प्रतिष्ठानले त्यो काम सुरु गर्नुपर्ने माग गरिन् ।

प्रदेश सरकारले स्वास्थ्य पहुँच बढाउनको लागि जिल्लामा अवस्थित अस्पतालमा भएका उपकरण प्रयोग गर्दै धनकुटामा चिकित्सक उपलब्ध गराउनु पर्ने माग गरिन् । उनले भनिन्, “धनकुटामै उपकरण र आईसीयूको सुविधा छ । तर चिकित्सक नहुँदा समस्या भएको छ । ताप्लेजुङमा पनि स्वास्थ्य पहुँच बढाउन आवश्यक छ ।”

थापाले बजेटमै पहाडी क्षेत्रका अस्पतालाई सुविधा सम्पन्न बनाउन व्यवस्था हुनुपर्ने माग गरिन् ।

राप्रपाका सांसद गोपाल विश्वकर्माले किसानले अहिले पनि मलखाद पाउन नसकेको भन्दै सरकारले उचित प्रबन्ध गर्नुपर्ने माग गरे । कांग्रेसका गोविन्द गिरीले पशुधनमा देखिएको लम्पी स्किन रोगको उचित उपचारको प्रबन्ध गराउन प्रदेश सरकारको ध्यानाकर्षण गराए ।