विराटनगर । जनता समाजवादी पार्टी (जसपा)ले कोसी प्रदेश सरकारबाट बाहिरिने निर्णय गरेको छ ।

सुनसरीको इटहरीमा बुधबार बसेको पार्टी प्रदेश समितिको बैठकले प्रदेश सरकारबाट आफ्नो पार्टीको तर्फबाट नेतृत्व गर्ने मन्त्रीलाई फिर्ता बोलाउने निर्णय गरेको हो ।

नेकपा (एमाले) नेतृत्वको वर्तमान प्रदेश सरकारमा जसपाकी निर्मला लिम्बू स्वास्थ्यमन्त्री छिन् । उनी गत पुस २५ गते मन्त्री बनेकी थिइन् ।

संघीय सरकारमा सत्ता गठबन्धनमा रहेको जसपा कोसी प्रदेशमा भने एमाले नेतृत्वको सरकारमा थियो । जसपा र नेकपा (माओवादी केन्द्र)लाई सरकारलाई दिएको समर्थन फिर्ता लिन कांग्रेसले दबाब दिँदै आएको थियो ।

जसपाका कोसी प्रदेश अध्यक्ष दिपक याख्खाले यसबारे आजै पत्रकार सम्मेलन गरेर जानकारी गराउने बताएका छन् ।

गत पुस २४ गते एमाले, माओवादी केन्द्र, राप्रपा र जसपाका ६० जना सांसदको समर्थनमा एमालेका हिक्मतकुमार कार्की कोसीको मुख्यमन्त्रीमा नियुक्त भएका थिए ।