काठमाडौं । नेपाल वायुसेवा निगमको प्रबन्ध निर्देशक (जीएम) फेर्न आफूसामु तीन करोड रुपैयाँको प्रस्ताव आएको संस्कृति, पर्यटन तथा नागरिक उड्डयनमन्त्री सुदन किरातीले खुलासा गरेका छन् ।

पर्यटनमन्त्री किरातीले आफू मन्त्री भएकै दिनदेखि यो प्रस्तावका लागि फोन आउन थालेको जानकारी दिए । त्यसको करिब एक सातापछि ‘एक ठूलो मान्छे’ले भेटेरै यस्तो प्रस्ताव गरेको उनले सुनाए ।

आइतबार काठमाडौंमा सञ्चारकर्मीसित कुरा गर्दै पर्यटनमन्त्री किरातीले आफूलाई एक महिनामै तीन करोड आउने भन्दै निगमका प्रबन्ध निर्देशक फेर्न प्रस्ताव गरिएको खुलासा गरेका हुन् ।

“वायुसेवा निगमको जीएम फेरौँ, तपाईंलाई टोकन मनी दुई करोड, फेरेको सात दिनमा अर्काे करोड, एक महिनामा तीन करोड प्रस्ताव भयो,” उनले भने ।

आफू मन्त्री भएको दिनदेखि नै ती ‘ठूला मान्छे’को फोन आएको र उनले एक्लै भेट्ने प्रस्ताव गरेको पनि मन्त्री किरातीले खुलाए ।

उनले भने, “छैटौँ दिन उहाँको फेरि फोन आयो– भोलि त एक्लै भेट्नैपर्‍यो, मैले भने– मेरो त टोली छ, सुरक्षाकर्मीहरू छन्, एक्लै भेट्न मिल्दैन । क्वाटरमा हैन, मन्त्रालयमा पनि हैन, उहाँले भनेकै ठाउँमा भेट्नुपर्ने, वनझाँक्रीको ओढारमा जानुपर्ने रे ! म त मिल्दैन भनेँ ।

मन्त्री किरातीले आफू प्रधानमन्त्रीको निवासमा भएको दिन पनि त्यही प्रयोजनको फोन आएको बताए । त्यो दिन आफू टोलीसहित फोन गर्ने मानिसलाई भेट्न गएको उनले जानकारी दिए ।

“उहाँले फेरि फोन गर्नुभयो– आज त भेट्नैपर्‍यो । म टोलीसँगै आउँछु न त भनेँ मैले र उहाँको घर गएँ,” उनले भने ।

सुरक्षाकर्मीलाई बाहिर राखेर आफू एक ‘भाइ’लाई लिएर ती मानिसको घरभित्र गएको र त्यहाँ बँदेलको मासुसहित ८४ व्यञ्जनको खानाले स्वागत गरिएको उनले सुनाए ।

उनले थपे, “पहिलो चरणको खानपिन सकेपछि उहाँले मलाई रित्तो कोठमा लग्नुभयो । भन्नुभयो– वायुसेवा निगमको जीएम फेरौँ, तपाईंलाई टोकन मनी दुई करोड, गरेको सात दिनमा अर्काे करोड, एक महिनामा तीन करोड ।”

कतै यो कुरा रेकर्ड भइरहेको पो छ कि भन्ने समेत आफूलाई लागेको उनले बताए ।

भेटमा ती व्यक्तिले राजनीतिको टुंगो नभएको र पद पाएका बेला ‘खाइहाल’ भन्ने संकेत गरको मन्त्री किरातीको भनाइ छ ।