विराटनगर । कोसी प्रदेशको बजेट अधिवेशन सुरु भएको छ । 

गत फागुन १७ गते प्रदेश नामाकरण पहिलो अधिवेशनको तेह्रौ बैठकले गरेसँगै बैठक स्थगित भएको थियो । सभामुख बाबुराम गौतमले लोकतान्त्रिक विधिबाट असन्तोष राख्न सकिने र शान्तिपूर्ण ढंगले आन्दोलन गर्न सबै पक्षलाई सुझाव दिन सभा समक्ष आग्रह गरे । 

शून्य समयमा बोल्दै नेकपा (एकीकृत समाजवादी) का सांसद कमलप्रसाद जबेगुले छोटो समयमा नाम राखेर राम्रो वा नराम्रो के गरियो भन्ने प्रश्न गर्दै बहुमतको आडमा अल्पमतको कदर नगरिएको बताए । उनले भने, “नामकरणको विषयमा उठेको आन्दोलन मत्थर गर्न वार्ता समिति गठन गर्नुपर्छ । सरकारले पहल गर्नुपर्छ ।”

कांग्रेस सांसद खगेनसिंह हाङगामले नामाकरणपछि कोसी प्रदेश अस्तव्यस्त देखिएकोले सरकारले घाइतेको उपचार गराउनुपर्ने बताए । उनले भने, “आन्दोलनकारीद्वारा वार्ता गर्न सरकारले विलम्ब गरिनुहुन्न ।”

 माओवादी केन्द्रका सांसद गणेश उप्रेतीले आन्दोलनमा रहेका मानिस को हुन् ? उनीहरूको माग सुन्ने कि नसुन्ने भन्दै प्रश्न गरे । भने,“वार्ता गर्न मुख्यमन्त्री वा सांसद कसले छेक्यो ?” उनले वार्ता बोलाएर आन्दोलनकारीको माग सुनुवाइ गर्नुपर्ने माग गरे । 

कांग्रेसका गोपाल तामाङले आफू ८ बजे नै प्रदेशसभा बैठकमा सहभागी हुन आएको र सांसद पदको लोगो खोलेर आएको बताए । भने, “सदनभित्र बैठक चलिरहँदा बाहिर झन् आन्दोलन बढेको देखिन्छ । त्यसैले किन वार्ता नगरेको ?” सरकारले वार्ता समिति बनाउनुपर्ने माग गरे । 
 राप्रपा सांसद गोपाल विश्वकर्माले पहिचानवादीले आन्दोलन गरेको लामो समय हुँदा समेत चासो नदिएको भन्दै आन्दोलनकारीसँग वार्ता गर्न सरकार समक्षआग्रह गरे । सांसद कमला थापाले झापामा हातीबाट हुने गरेको क्षति आँकलन गरी नियन्त्रणमा ध्यान दिनुपर्ने बताए ।