जनकपुरधाम । मधेस प्रदेश सरकारमा लोकतान्त्रिक समाजवादी पार्टी (लोसपा) सहभागी हुन लागेको छ । लोसपाबाट संसदीय दलको नेता अभिराम शर्मालाई ‘काउन्टर’ गर्दै रमेश कुर्मी मन्त्री बन्न लागेका हुन् ।

बिहीबार दिउँसो ४ बजे उनको शपथ कार्यक्रम राखिएको छ । उनी वन तथा वातावरण मन्त्री बन्न लागेका छन् ।

यसअघि, लोसपा दलको नेता शर्माले मुख्यमन्त्री सरोज कुमार यादवसँग दुईवटा मन्त्रालय दिनुपर्ने अडान राख्दै सरकारमा सहभागी भएका थिएनन् । तर, आज कुर्मीले केन्द्रबाटै मन्त्री बन्न सिफारिस ल्याएर मन्त्री पदमा शपथग्रहण गर्ने तयारी गरेका हुन् ।

लोसपा, जनमत र नेकपा (माओवादी केन्द्र)का केही नेताहरु छुट्टै गठबन्धन बनाउन प्रयासरत छन् । उनीहरु पटकपटक बैठक बसिरहेका बताइएको छ ।

माओवादी केन्द्र संसदीय दलका नेता भरतप्रसाद साहले सरकारबाट बाहिरिने निर्णय गरेको दाबी गरे पनि सोही पार्टीबाट मन्त्री बनेकी सुनिता यादव र रहबर अन्सारीले राजीनामा दिएका छैनन् ।

जनमतबाट भूमि व्यवस्था तथा कृषि सहकारीमन्त्री बनेका वसन्त कुशवाह र राज्यमन्त्री सञ्जय यादवलाई मुख्यमन्त्री यादवले जिम्मेवारीविहीन बनाएका छन् । अब जनमतले नेकपा (एमाले)बाट सभामुख बनेका रामचन्द्र मण्डललाई हटाउन सहयोग गरे मात्रै जिम्मेवारीमा ल्याउने जसपा र कांग्रेसको मानसाय रहेको कांग्रेसका एक सांसद बताउँछन् । 

कुर्मी आज मन्त्री बनेपछि मुख्यमन्त्रीसँग दुईवटा मन्त्रालय बाँकी हुन्छन् । गृह, सञ्चार तथा कानुन मन्त्रालय र श्रम तथा यातायात मन्त्रालय बाँकी हुनेछन् । 

अहिले जसपाबाट मन्त्री रहेकी सुरिता साहलाई पनि जिम्मेवारीविहीन बनाएर पछि व्यवस्थापन गर्ने भनिएको छ । अब सुरितालाई बाँकी रहेको यी दुई मन्त्रालयबाट एक र जनमतलाई एक मन्त्रालय दिइनेछ । त्यसपछि मधेस प्रदेश सरकारको मन्त्रिपरिषद् पूर्ण हुनेछ ।