काठमाडौं । खेलाडी स्थानान्तरणको नियम उल्लंघन गरेको भन्दै इटालियन क्लब युभेन्टसको १० अंक कटौती गरिएको छ ।

अंक कटौतीपछि भएको खेलमा युभेन्टस सोमबार राति इम्पोलीसँग ४–१ ले पराजित भयो । योसँगै युभेन्टसको च्याम्पियन्स लिग खेल्ने सम्भावना पनि लगभग समाप्त भएको छ ।

सजाय पाउनुअघि युभेन्टस ६९ अंकका साथ दोस्रो स्थानमा थियो । युभेन्टसलाई दिइएको यो सजायसँगै क्लब सातौँ स्थानमा झरेको छ । क्लबको अब ३६ खेलबाट ५९ अंक छ । त्यो चौथो स्थानको एसी मिलानभन्दा पाँच अंकले पछाडि हो ।

लिगमा अब दुई खेल मात्र बाँकी छ । त्यसकारण युभेन्टसको युरोपियन प्रतियोगिता सम्भावना कमजोर बनेको हो ।

गए राति घरेलु टोली इम्पोलीले फ्रान्सेस्को क्यापुटोको दुई गोल र सेबास्टियानो लुपेर्टोको गोलबाट पहिलो हाफमै ३–० को अग्रता लिएको थियो । ८५औँ मिनेटमा युभेन्टसका फेडेरिको चिएसाले गोल फर्काए । इन्ज्युरी समयमा रोबर्टो पिकोलीले अर्को गोल थपेपछि इम्पोलीले सहज जित दर्ता गर्‍यो ।

“यो अनौठो अवस्था थियो । खेल सुरु हुनुभन्दा १० मिनेट आगडि यस्तो समाचार आयो,’’ युभेन्टसका प्रशिक्षक मासिमिलियानो एलेग्रीले भने, “यस्तो तरिकाले सिजनको अन्त्य गरिनु अन्याय हो । हामीलाई जित्ने बानी परेको थियो । त्यसमा धक्का लागेको छ ।’’

सुरुमा युभेन्टसको १५ अंक कटौती गर्नुका साथै क्लबका महत्त्वपूर्ण पदाधिकारीलाई निलम्बन गरिएको थियो । तर, पुनरावेदनबाट क्लबको १० कटौती गरिएको छ । पदाधिकारीको निलम्बन फुकुवा गरिएको छ ।