काठमाडौं  । ललितपुर जिल्ला पावर लिफ्टिङ संघको आयोजना तथा नेपाल पावर  लिफ्टिङ संघको सहकार्यमा काठमाडौंमा वाग्मतीस्तरीय पावर लिफ्टिङ प्रतियोगिता आयोजना हुने भएको छ । बुधबार आयोजक ललितपुर जिल्ला पावर लिफ्टिङ संघले पत्रकार सम्मेलन आयोजना गरी काठमाडौंमा प्रतियोगिता आयोजना गर्न लागेको जानकारी दिएको हो । आयोजकका अनुसार, वैशाख ५ र ६ गते राजधानीस्थित दशरथ रंगशालाको कभर्ड हलमा प्रतियोगिता हुनेछ ।

प्रतियोगितामा वाग्मती प्रदेशमा दर्ता भएका संघ मात्रै सहभागी हुन पाउने र ती संघबाट मात्रै नेपालभरिका खेलाडीहरूले खेल्न पाउने आयोजकले जनाएको छ ।

प्रतियोगितामा कुल १३ विधामा प्रतिस्पर्धा हुने जनाइएको छ । प्रतियोगितामा पुरुष, महिला र उमेर समूह गरी तीन विधाअन्तर्गत विभिन्न व्यक्तिगत प्रतिस्पर्धा हुने जनाइएको हो । जसमा पुरुषतर्फ ५९, ६६, ७४, ८३ भन्दा मुनि र ८३ भन्दामाथिको तौल समूहमा प्रतिस्पर्धा हुनेछ । महिलातर्फ पनि ५७, ६३, ६९ भन्दामुनि र ६९ भन्दा माथिको तौल समूहमा प्रतिस्पर्धा हुनेछ । र, उमेर समूहतर्फ मास्टर वर्गमा पुरुषतर्फ ५० वर्ष भन्दामाथि, महिलातर्फ ४० वर्ष माथि, सब जुनियरमा पुरुषतर्फ १८ वर्षभन्दा कम र जुनियरतर्फ पुरुषमा २३ वर्ष कम उमेरका पावर लिफटरहरूले प्रतिस्पर्धा गर्नेछ ।

प्रतियोगिताको प्रत्येक तौल वर्गका पहिलो, दोस्रो र तेस्रो हुने खेलाडीहरूले क्रमशः २० हजार, १५ हजार र १० हजार रुपैयाँ पाउनेछन् । त्यसैगरी, हरेक उमेर समूहमा पहिलो, दोस्रो र तेस्रो हुनेले क्रमशः ३० हजार, १५ हजार र १० हजार रुपैयाँसहित ट्रफी, मेडल र आकर्षक गिफ्ट ह्याम्पर पाउनेछन् ।

प्रतियोगितको अनुमानित बजेट २५ लाख रुपैयाँ रहेको छ । जसमा नगद पुरस्कारका लागि मात्रै आठ लाख रुपैयाँ छुट्याइएको छ । प्रतियोगितामा १०० देखि १५० खेलाडीले सहभागिता जनाउने बताइएको छ । अगामी साउन ३०, ३१ र भदौ १ गते काठमाडौंमा आयोजना हुने एसियन पावर  लिफ्टिङ प्रतियोगिताका लागि पनि खेलाडी छनोट गरिने बताइएको छ ।