काठमाडौं । प्रतिनिधिसभाअन्तर्गतको अर्थ समितिले अर्थतन्त्रमा अहिलेको सूचकहरूका बारेमा अर्थमन्त्री डा. प्रकाशशरण महतसँग छलफल गर्ने भएको छ ।

मंगलबार सिंहदरबारमा बसेको समिति बैठकबाट अर्थतन्त्रको अवस्था र सूचकहरूका बारेमा अर्थमन्त्रीसँग छलफल गर्ने निर्णय गरिएको सदस्य ज्ञानेन्द्र शाहीले जानकारी दिए ।

यस्तै, अर्थतन्त्रका विषयमा सरोकारवालासँग छलफल गरी बजेट निर्माणमा सहयोग गर्ने निर्णय गरिएको उनले बताए ।

समितिलाई पूण रूपमा डिजिटल प्लेटफर्ममा लैजाने विषयमा पनि छलफल भएको शाहीले जानकारी दिए ।

सांसद विष्णु पौडेलले बजेटको ‘पोलिसी’मा सुझावहरू दिनुपर्ने र छलफलमा अर्थमन्त्रीलाई बोलाउनुपर्ने बताए ।

सांसदहरूले समितिको डिजिटल अभिलेखीकरणलाई व्यवस्थित गर्नुपर्ने बताएका थिए ।

वर्तमान अर्थ समितिको पहिलो बैठक नेपाली कांग्रेसका सांसद एवं समितिका ज्येष्ठ सदस्य सन्तोष चालिसेको सभापतित्वमा बसेको थियो ।