काठमाडौं । राष्ट्रियसभा अध्यक्ष ‍गणेशप्रसाद तिमिल्सिनाले सरकारले मेलम्ची खानेपानी विकास समिति खारेजी गर्ने निर्णय हतारमा गरेको बताएका छन् । उनले सरकारले यस्ता विषयमा अध्ययन र भविष्यमा पर्ने प्रभावका बारेमा सोचेर अगाडि बढ्नुपर्ने बताए । 

राष्ट्रिय सरोकार तथा समन्वय समितिको आयोजनामा मेलम्ची खोलामा आएको बाढीले क्षतिग्रस्त राष्ट्रिय गौरवको मेलम्ची खानेपानी आयोजनाको स्थलगत अनुगमनका क्रममा उनले सो कुरा बताएका हुन् ।

अध्यक्ष तिमिल्सिना, समितिका सभापति दिलकुमारी रावल(पार्वती) र समितिका सदस्यहरूले सिन्धुपाल्चोकको हेलम्बुस्थित हेडवक्स र काठमाडौं सुन्दरीजलमा रहेको पानी प्रशोधन केन्द्रको स्थलगत अनुगमन गरेका हुन् । उनीहरूले आयोजनाको प्रगति, समस्याका बारेमा जानकारी लिएका अध्यक्ष तिमिल्सिनाको सचिवालयले जानकारी दिएको छ ।

साथै, उनले मेलम्चीजस्ता अति आवश्यक राष्ट्रिय गौरवका आयोजनामा बजेट अभाव हुन नहुने र अन्य आयोजना कटौती गरेर पनि बजेट थप गर्नुपर्ने बताए । आयोजनाका बारेमा समितिका कार्यकारी निर्देशक कमलराज श्रेष्ठले संसदीय अनुगमन समितिलाई जानकारी गराएका थिए ।