काठमाडौं । इन्जुरी समयमा फेडरिको गाट्टीले गोल गरेपछि युभेन्टस बिहीबार राति युरोपा लिग सेमिफाइनलको पहिलो लेगमा हारबाट जोगिएको छ । युभेन्टसले घरेलु मैदानमा सेभियासँग १–१ को बराबरी खेलेको हो । 

भारी वर्षाका बाबजुद इटालियन समर्थकले खचाखच भरिएको एलिनाज रंगशालमा सेभियाले सुरुबाट घरेलु टोली युभेन्टसलाई दबाबमा राखेको थियो । कीर्तिमानी सातौँ उपाधि जित्ने लक्ष्यमा रहेको सेभियाले २६औँ मिनेटमा युसुफ इन–नेसिरीले गरेको गोलबाट अग्रता लिएको थियो । 

पहिलो हाफमै इन–नासिरी र लुकास ओकम्पसले गोलका राम्रो अवसर सदुपयोग गर्न नसक्दा सेभियाले अग्रता दोब्बर बनाउने मौका गुमाएको थियो । त्यस्तै इभान राकिटिचको सशक्त प्रहारलाई पनि युभेन्टसका गोलकिपर वोइचेक स्चेस्नेले राम्रो बचाउ गरेका थिए । 

कमजोर सुरुआत गरेको युभेन्टसले ६५औँ मिनेटमा पहिलोपटक विपक्षी पोष्टमा प्रहार गर्न सफल भएको थियो । बैकल्पिक खेलाडी फेडरिको चिएसाको आगमनसँगै युभेन्टसले सुधारिएको प्रदर्शन गरेको थियो । इन्जुरी समयको सातौँ मिनेटमा पाउल पोग्बाको हेडिङ पासमा गाट्टीले हेडमार्फत गोल गरेपछि युभेन्टस हारबाट जोगिएको हो । 

‘‘हामीले सुरुमा केही गलत निर्णय गर्यौं । सेभियालाई आज हामीविरुद्ध कस्तो मानसिकतामा खेल्नुपर्छ भन्ने थाहा थियो,’’ युभेन्टसका प्रशिक्षक मासिमिलियानो एलेग्रीले भने, ‘‘हामीले केही समयमा उनीहरूलाई रोक्न सफल भयौं र उनीहरू २–० को अग्रता लिन सफल भएन । अब सेभियामा हामीले नतिजा निकाल्ने अवसर छ ।’’