पोखरा । प्रदेश प्रमुख पृथ्वीमान गुरुङले मंगलबार दलहरूलाई सरकार गठनका लागि दाबी पेस गर्न आह्वान गरेका छन् । संविधानको धारा १६८ (२) अनुसार सरकार गठनका लागि आह्वान गर्दैगर्दा उनले बिहीबार दिनको ४ बजेसम्मको लागि समयसीमा तोकेका छन् ।

तर, गण्डकीमा सत्ताको दाबीको किचलो भने अझै सकिएको छैन । सोमबार मात्रै प्रधानमन्त्री तथा माओवादी केन्द्रका अध्यक्ष पुष्पकमल दाहाल 'प्रचण्ड' र कांग्रेस सभापति शेरबहादुर देउवाले गण्डकीको मुख्यमन्त्री सुरुमा कांग्रेसलाई दिने सहमति गरेका थिए ।

सोमबार नै गण्डकीमा कांग्रेसको सरकार बनाउनका लागि दबाब दिन काठमाडौं डेलिगेसन गएका कांग्रेसका प्रदेश सांसदहरूले गण्डकी र लुम्बिनी कांग्रेसले पाउने सहमति भएको सुनाएका थिए । कांग्रेसले संविधानको धारा १६८ उपधारा ३ अनुसार मुख्यमन्त्रीमा नियुक्त गर्नुपर्ने दबाब सिर्जना गर्नको लागि कांग्रेस सभापति र प्रधानमन्त्रीलाई संयुक्त भेट गरेका थिए ।

तर, शीर्ष नेताहरूले उपधारा ३ अनुसार सरकार गठनको सट्टा २ अनुसार नै गर्ने र सुरुमा कांग्रेसले सरकारको नेतृत्व गर्ने सहमति गरे । त्यसपछि मंगलबार कांग्रेसका अधिकांश सांसद पोखरा फर्किएका छन् भने केही सांसद बुधबार फर्किनेछन् ।

उनीहरू फर्किएपछि माओवादी सांसदसहितको हस्ताक्षर लिएर प्रदेश प्रमुखकोमा जाने तयारी कांग्रेसको छ ।

“बिहीबारसम्मको समय छ । माओवादी साथीहरूसँग बसेर एकपटक छलफल गर्छौं । त्यसपछि कति बजे जाने भन्ने निर्णय होला,” कांग्रेस संसदीय दलका नेता सुरेन्द्रराज पाण्डेले भने । 

तर, माओवादीले सरकारको नेतृत्वको आफैँले पाउनुपर्ने अडान अझै छाडेको छैन । मंगलबार नै माओवादी केन्द्र संसदीय दलको बैठक पनि बस्यो । उक्त बैठकले सरकारको दाबी नछाड्ने र प्रधानमन्त्री तथा पार्टी अध्यक्ष प्रचण्डलाई भेट्नुपर्ने निर्णय गर्‍यो । संसदीय दलको बैठकबाट सोही निर्णय गराएर माओवादी केन्द्र संसदीय दलका नेता हरिबहादुर चुमान भने मंगलबार साँझ नै काठमाडौं लागेका छन् ।

“मलाई अध्यक्षज्यूसँग स्पष्ट हुनु छ, दलका नेताहरू बसेर पहिलो पालो हाम्रो भनेर भनेको हो । फेरि अर्को कुरा किन भयो भन्ने क्लियर पार्नुपर्‍यो । कसरी जाने भन्ने पनि क्लियर गर्नुपर्‍यो.” उनले भने ।

सरकार गठनका लागि कांग्रेसले संयुक्त बैठक आह्वान गरे पनि चुमान भने दलका अन्य नेता सहभागी हुने बताएका छन् ।

“अघि साँझ बैठक बसौँ भन्नुभएको थियो, मैले हाम्रा साथीहरू बस्नुहुन्छ भनेको छु,” चुमानले भने ।

माओवादीले दाबी नछाडे पनि माओवादीकै एक सांसदले भने अब गण्डकीमा कांग्रेसको सरकार बन्ने निश्चितजस्तै रहेको बताए । 

"कांग्रेसकै नेतृत्वमा सरकार बन्ने निश्चित जस्तै हो, एक किसिमको सहमति भइसकेको छ, उहाँ (हरि चुमान) जानुभएको होला, तर अब फरक पर्दैन," उनले भने ।