जनकपुरधाम । संघीय सरकारमा गठबन्धन फेरिएसँगै प्रदेशमा पनि सत्ता समीकरणमा फेरबदल सुरु भएको छ । केन्द्रमा नेकपा (एमाले) सरकारबार बाहिरिएसँगै नेपाली कांग्रेसको प्रवेश भएको छ । यससँगै मधेस प्रदेशमा पनि सत्ताबाट ठूलो दल एमालेलाई ‘आउट’ गर्न प्रदेशसभाको दोस्रो ठूलो दल कांग्रेसले गृहकार्य सुरु गरेको छ ।

एमालेलाई सत्ताबाट ‘आउट’ गरेर कांग्रेस ‘इन’ हुने गरी छलफलहरु अगाडि बढाइए पनि कांग्रेसले मुख्यमन्त्री आफूले पाउनुपर्ने दाबी गर्दा एमाले सरकारमै रहनसक्ने सम्भावना रहेको पनि नेताहरुको तर्क छ ।

एमालेबाट मधेस सरकारमा सहभागी मन्त्रीहरु गत बुधबार मुख्यमन्त्रीलाई राजीनामा बुझाउने तयारी गरेका थिए । तर, मुख्यमन्त्रीको आग्रह तथा एमाले शीर्ष नेताहरुको निर्देशनमा राजीनामा नबुझाइएको एमालेबाट कानुन, न्याय तथा प्रदेशसभा मामिलामन्त्री रहेका राजकुमार लेखीले बताए । 

“आफनो पार्टीबाट प्रतिनिधित्व गर्ने मन्त्रीहरु बसेर राजीनामा दिने तयारी गरेका थियौं,” उनले भने, “तर, स्वयं मुख्यमन्त्री र हाम्रै पार्टी शीर्ष नेताहरुले तत्काल राजीनामा नदिन आग्रह गरेपछि हामीहरुले राजीनामा दिएनौँ । अब हेरौं के हुन्छ ।”

मुख्यमन्त्री सरोजकुमार यादवले कांग्रेसले मुख्यमन्त्रीमा दाबी गरेका कारण एमालेका मन्त्रीहरुलाई रोकेको बताइएको छ । जसपाले मधेसमा नेतृत्व छोड्न तयार छैन । अढाई वर्ष जसपाले कम्तिमा नेतृत्व गर्ने गरी एमालेलाई रोकेको छ । 

तर, मधेस प्रदेशको सरकारमा कांग्रेसले नेतृत्व पाउने पर्ने कांग्रेस प्रदेश संसदीय दलका नेता कृष्णाप्रसाद यादवले बताए । 

“ठूलो दलको हैसियतले पनि हामीले नेतृत्व मागेका छौं,” उनले भने, “अर्को कुरा जसपालाई यसअघि पनि जनताले हेरिसकेको छ । अब नयाँ नेतृत्व आउनु पर्छ ।” प्रधानमन्त्री र आफ्नो सभापतिलाई नेतृत्व पाउनुपर्ने जानकारी गराइसकेको पनि उनले बताए ।

मधेसमा एमालेबाट सभामुख रामचन्द्र मण्डल, भौतिक पूर्वाधारमा सरोजकुमार यादव, गृह तथा सञ्चारमा शत्रुधन सिंह कोइरी र राज्यमन्त्री केशव राय, महिला बालबालिका, युवा तथा खेलकुदमन्त्री मोहम्मद जैयद आलम र कानुन, न्याय तथा प्रदेशसभा मामिलामन्त्रीमा राजकुमार लेखी छन् । 

जसपाका अध्यक्ष उपेन्द्र यादव भने उपनिर्वाचनमा सत्ता गठबन्धनको तर्फबाट साझा उमेदवारीको प्रतिवद्धताको पर्खाइमा छन् । सत्ता गठनबन्धनको साझा उमेदवार भएमात्रै प्रदेश सरकारमा अन्य दललाई सहभागी गराउने उनको इच्छा छ ।

जनमतलाई संकट

जनमत पार्टीका अध्यक्ष तथा प्रतिनिधिसभा सांसद डा. चन्द्रकान्त (सीके) राउतले केही दिनमा हुने उपनिर्वाचनमा जसपा अध्यक्ष यादवविरुद्ध जनमत पार्टीले उमेदवारी दिने घोषणा गरिसकेका छन् । यो अवस्थामा जनमतले उमेदवारी दिए जनमतलाई सरकारबाट हटाउने मुख्यमन्त्रीको मनसाय छ ।

जनमत पार्टीले मधेस सरकार गठनको बेला साढे दुई वर्ष सरकारको नेतृत्व गर्ने गरी सहमति भएको थियो । अब त्यो पनि पूरा नहुने सम्भावना देखिएपछि जनमतले जसपा अध्यक्षलाई संसद् प्रवेशमा रोक लगाउने मोर्चा बनाइरहेको छ । जनमतबाट मधेस प्रदेशमा दुईजना मन्त्री र एकजना राज्य मन्त्री रहेका छन् ।

मधेसको प्रदेशसभामा एमालेको २४, कांग्रेसको २२, जसपाको १७, जनतम १३, लोसपा नौ, माओवादी नौ, नेकपा (एकीकृत समाजवादी) सात, नागरिक उन्मुक्ति र राप्रपाको एक÷एक प्रदेशसभा सदस्य छन् ।