नवनिर्वाचित राष्ट्रपति रामचन्द्र पौडेलको शपथ ग्रहणसँगै निवर्तमान राष्ट्रपति विद्यादेवी भण्डारी कार्यकाल पूरा गरेर घर सोमवार घर फर्कँदै छिन् । विवादरहित हुन नसके पनि उनले गणतन्त्र नेपालको राष्ट्रपतिका रूपमा दुई कार्यकाल निर्बाध पूरा गरिन् । 

उनका निर्णयहरू र जीवन शैलीको बढी नै आलोचना भयो । राष्ट्रपति भण्डारीकै व्यवहारप्रति लक्षित गर्दै गणतन्त्रकै बदनाम गर्ने प्रयाससमेत गरियो । विशेषगरी, नेकपा (एमाले)प्रतिको उनको मोह बढी आलोचित भयो ।

राष्ट्रपति भण्डारीको प्रतिनिधि सभा विघटन गर्ने निर्णय सर्वोच्च अदालतले दुईपटकसम्म असंवैधानिक ठहर गरेको थियो । त्यस्तै, नेपालको संविधानको धारा ७६ को उपधारा (५) बमोजिम प्रधानमन्त्री नियुक्त गर्न सर्वोच्च अदालतले परमादेश नै जारी गर्नुपर्‍यो ।

राष्ट्रपति भण्डारीले प्रतिनिधि सभामा फर्काएकी विधेयक पुनः पारित गरेर पठाएपछि पनि उनले संविधानले तोकेको म्यादभित्र जारी नगरेर तुहाइदिइन् । नेकपा (एमाले)का अध्यक्ष खड्गप्रसाद ओली प्रधानमन्त्री हुँदा र नहुँदा अध्यादेशकै हकमा पनि अलग व्यवहार  भयो ।

यसैले उनको कार्यकाल सफल भन्न त सकिँदैन तर नेपालको पहिलो महिला राष्ट्रपतिका रूपमा इतिहासमा उनले आफ्नो स्थान सुरक्षित राखेकी छन् । उनले गरेका विवादास्पद निर्णय र अभ्यासमा पनि उनलाईमात्र दोषी ठान्नु अन्याय हुन्छ । मूलतः  तत्कालीन प्रधानमन्त्री ओलीकै निर्णय उनले कार्यान्वयन गरेकी हुन् । 

अब उनको मूल्याङ्कन इतिहासले गर्नेछ । पूर्वराष्ट्रपतिका रूपमा विद्यादेवी भण्डारीको प्रतिष्ठा देशकै गरिमासँग जोडिएको हुन्छ । उनी स्वयंले पनि आफू पूर्वराष्ट्राध्यक्ष भएको हेक्का राख्नुपर्छ भने समाजले पनि बिर्सनु हुँदैन ।  

राष्ट्रपतिका रूपमा विद्यादेवी भण्डारीले गरेका गल्तीहरू भावि राष्ट्राध्यक्षहरूका लागि पाठ बन्न सक्छ । उनका राम्रा कामहरू राष्ट्रकै धरोहर हुनेछन् । राष्ट्रपति भण्डारीप्रति आभार व्यक्त गर्दै उनको भावि जीवन सुखद, स्वस्थ र शान्तिपूर्ण होस् भन्ने कामना गरौँ ।