काठमाडौं । उडिरहेको जहाज एक्कासि हल्लिन थाल्यो । त्यतिकैमा एयर होस्टेसले अनाउन्स (उद्घोष) गरिन्– 'हाम्रो जहाजको दुई वटा इन्जिङमध्ये एउटामा समस्या आयो । हामी काठमाडौं डाइभर्ट गर्दै छौँ ।'

एयर होस्टेसले अगाडि भनिन्– 'अबको १२ मिनेटमा हामी काठमाडौं ल्यान्ड (अवतरण) गर्नेछौँ । नआत्तिकन सिटको बेल्ट बाँधेर बस्नुहोला ।'

“त्यसपछि जहाजमा यात्रुहरू एकाएक चिच्याउन थाले । कोलाहल मच्चियो । के गरौँ, कता जाऊँ भयो । अनि पोखरा विमान दुर्घटनाको याद आयो । भगवानको नाम जप्न थाल्यौँ,” राजाराम खड्काले भने । 

श्री एयरलाइन्स । उडान नम्बर एसएचए ८२१ । उड्ने समय थियो, बिहीबार बिहान ७ः३० बजे । गन्तव्य थियो, भैरहवा । काठमाडौंबाट उड्ने तालिका थियो ।

त्रिभुवन अन्तर्राष्ट्रिय विमानस्थल (टीआईए) मा सबै यात्रुहरू समयमै पुगिसकेका थिए । तर, जहाज डिले (ढिलो) भयो । साढे ७ बजे उड्नुपर्ने जहाजले ९ः३८ बजे मात्र टेकअप लियो । जहाजलाई क्याप्टेन भरतसिंह थापाले उडाएका  थिए ।

राजाराम खड्का शुभलक्ष्मी सिमेन्टका प्रबन्ध सञ्चालक हुन् । उनीसहित ७४ जना यात्रु त्यही जहाजमा सवार थिए । जहाजमा थप चारजना चालकदलका सदस्यगरी ७८ जना थिए । जहाजको सिट क्षमथा थियो, ८०। 

तर, जब जहाज उड्यो खड्काले जहाजले केही सन्तुलन गुमाएको महसुस गरे । उनले ठट्टा गर्दै छेउमा बसेका साथीलाई भनेका थिए– 'के हो, आज त केटाहरूले जहाज पनि मोटरसाइकल जसरी चलाइरहेका छन् त ।' 

उनको ठट्टा लामो समयसम्म टिकेन । एयर होस्टसले 'जहाजमा समस्या आएको' अनाउन्स गर्न बित्तिकै डर हाबी भइहाल्यो । 

त्यसपछि क्रू मेम्बर (चालक दलका सदस्य)ले यात्रुहरूलाई नडराउन आग्रह गरे । सुरक्षित रूपमा जहाज अवतरण गराउने आश्वासन दिए । सम्झाउने प्रयास गरे । उनीहरू भनिरहेका थिए– जहाजका दुई वटा इन्जिङ हुन्छन् । एउटा इन्जिङले काम नगरेपनि अर्काे इन्जिङले काम गर्छ ।

तर पनि जहाजको कोलाहल रोकिएन । 

एकैछिमा जहाज काठमाडौं प्रवेश गर्‍यो । सुरक्षित रूपमा अवतरण गर्‍यो । 

अघिसम्म रोहिरहेका यात्रुहरूले चालक दललाई धन्यवाद दिए । जहाजबाट बाहिर निस्कँदा विमानस्थलमा सुरक्षाका साधनसहित सुरक्षाकर्मी तैनाथ थिए ।

पछि ती यात्रुहरूलाई अर्काे जहाजको व्यवस्था गरिएको थियो । खड्कासहित ६० प्रतिशत यात्रु श्री एयरलाइन्सको अर्काे जहाजबाट भैरहवा पुगे ।