काठमाडौं । केही दिन अगाडि हरिवंश आचार्यले एउटा गीत सार्वजनिक गरे । गीत सुरु हुनुभन्दा अगाडि भिडियोमा देखिन्छ– यस्तो काम अब कहिल्यै नहोस् । गीत भ्रष्टाचार विरोधी छ । हरिवंशले ‘यस्तो काम अब कहिल्यै नहोस्’ भनेर भ्रष्टाचारलाई संकेत गरेका हुन् ।

नेपाली समाज अहिले भ्रष्टाचारको चंगुलमा फसेको छ । त्यसको मुख्य पक्ष शासनसत्ता नै हो । शासन सत्ताको बागडोर जसले सम्हालेको छ, त्यहीँबाट भ्रष्टाचार सुरु हुने गरेको हरिवंशले गीतमार्फत भनेका छन् । 

उनको गीतको बोल नै ‘हाम्म हाम्म’ छ । जसले सक्छ उसैले खान्छ भन्ने गीतको केन्द्रीय कथा हो । राजनीतिमा कसरी अहिलेको चलनचल्तीको भाषामा ‘सेटिङ’ गरिन्छ । र, लाभको पद र सरकारी ढुकुटीको दुरुपयोग हुन्छ र भइरहेको छ गीतले उजागर गरेको छ ।

आफन्त, नाता र परिवार मिलेर सरकारी सम्पत्तिको दुरुपयोग भइरहको र त्यसको नकारात्मक असर नेपाल र नेपाली जनताले भोगिरहेको तथ्यलाई आफूले गीतमार्फत सुनाउन खोजेको हरिवंश बताउँछन् । 

“राजनीतिमा श्रीमती र परिवारका अन्य सदस्यलाई पठाउने चलन हाबी भएको छ । श्रीमती र आफन्तले उच्च ओहोदामा पुग्न चाहनेसँग पैसा डिमान्ड गर्ने र पैसा दिने व्यक्ति नै राज्यको उच्च पदहरूमा पुग्ने प्रवृत्ति मौलाएको छ,” हरिवंश बाह्रखरीसँग भन्छन्, “यो प्रवृत्ति अहिले पनि छ, पहिले पनि थियो । यसलाई निमिट्यान्न पार्न पाए हुन्थ्यो भन्ने मेरो चिन्ता हो ।” 

नेपाली राजनीतिमा यो प्रवृत्तिले जरो गाड्दै जानुमा नेतासँगै जनताको पनि उत्तिकै दोष रहेको उनको ठम्याई छ । जसलाई गाली गर्यो उसैलाई शासनसत्ताको चावी जनताले पटक–पटक सुम्पिने गरेको उनी बताउँछन् । “कमजोरी त हाम्रो पनि छ । हामी जनता जसलाई चर्को गाली गर्छौं उसैलाई निर्वाचनमा भोट दिएर जिताएर पठाउँछौँ,” हरिवंश भन्छन्, “निर्वाचनमार्फत हामीले खराब नेतालाई पराजित गरेर दण्ड दिनु पर्ने हो । तर, त्यसो गर्न सकिरहेका छैनौँ ।”

आफूले निर्वाचन अगाडि नै यो गीत सार्वजनिक गर्ने तयारी गरे पनि विभिन्न कारणले सम्भव नभएको हरिवंश बताउँछन् । गाइजात्रामै रिलिज गर्ने तयारी रहे पनि एनिमेशनलगायत अन्य कारणले सम्भव नभएको उनले जानकारी दिए । 

नेपाली राजनीति र समग्र क्षेत्रमा देखिएको विक्रिति र विसंगतिको अन्त्यको प्रयासस्वरुप आफ्नो तहबाट प्रयास गरेको पनि उनी बताउँछन् । समाजलाई सचेत बनाएर सुशासनयुक्त समाज निर्माणका लागि प्रयास आवश्यक रहेकोमा उनको जोड छ । 

राजनराज शिवाकोटीले संगीत भरेको गीतमा शब्द तथा स्वर हरिवंशको छ । गीतमा एनिमेटेड भिडियो छ । जसरी पनि पैसा कमाउनु पर्छ भन्ने विक्रित मानसिकताबाट अगाडि बढेको समाजमा थिति बसाउने कुनै पनि निकाय नरहेको बताउने गीतले भ्रष्टाचार गर्नेलाई नियन्त्रण गर्ने कोही/कुनै निकाय नरहेको व्यंग्य गर्छ । नेपालमा चुनाव कसरी जितिन्छ भन्ने विषयलाई प्रष्ट पारेको गीतले मिलेमतोमा विकासका काम कसरी अलपत्र पारिन्छ भन्ने देखाएको छ । 

एनिमेटेड भिडियोले विकृत बन्दै गएको नेपालको चुनावी प्रणाली, भ्रष्टाचारमा दल र ठेकेदारको मिलेमतो, भ्रष्ट नेताकै पछि लाग्ने जनता तथा नामभन्दा पनि पैसाको पछि लाग्ने समाजलाई देखाएको छ । सरकारको ढोका कस्ता व्यक्तिलाई खुल्छ र कसलाई बन्द हुन्छ त्यो पनि गीतले छर्लंग पारेको छ ।