इटहरी (सुनसरी) । चुनाव नजकिँदै गर्दा मुखमा मोरङ र सुनसरीका सिमावर्ती क्षेत्रमा नक्कली नोटको कारोबार गर्ने गिरोह सक्रिय भएको छ । यसले चुनावमा मतदातालाई असर गर्नसक्ने कतिपय उमेदवारले बताएका छन् । प्रदेशको राजधानी विराटनगरका बैंकमा दसैँयता नक्कली नोट फेला परेको दर्जनौ घटना सार्वजनिक भइसकेका छन् । तर, विराटनगर र सीमावर्ती क्षेत्रमा यसको नियन्त्रणमा प्रहरी प्रशासनले खासै चासो दिएको पाइएको छैन । सुनसरीमा भने जाली नोट कारोबारमा संलग्नहरू पक्राउ पर्न थालेका छन् । 

चुनावको मौका छोपेर सीमावर्ती क्षेत्रमा नक्कली नोटको कारोबार गर्न गिरोह सक्रिय भएको पाइएको हो । खुला सीमा र निर्वाचनको बेला आर्थिक कारोबार बढी हुने हुँदा कारोबारीहरु सक्रिय हुने सुनसरी प्रशासनको भनाइ छ । 

सुनसरीको देवानगञ्ज गाउँपालिकमा नक्कली नोटको कारोबार गरेको आरोपमा सुनसरी प्रहरीले १ नावालकसहित २ जनालाई पक्राउ गरेको छ । १ हजारको ६ थान नक्कली नोटसहित देवानगञ्ज गाउँपालिका २ का रवीन्द्र कुमार मेहता, श्यामदेव मेहता र एक नावालकलाई प्रहरीले पक्राउ गरेको थियो । जाली नोट कारोबारमा उनीहरूलाई मुद्दा चलाएको जनाइएको छ । 

श्यामदेव मेहतालाई अहिले पूर्पक्षको लागि जेल चलान गरिएको छ । उनको साथबाट ५ थान एक हजारका नक्कली नोट बरामद भएको थियो । एक थान नक्कली नोटसहित पक्राउ परेका रवीन्द्रलाई अदालतले २ लाख रुपैयाँ धरौटी माग गरेको छ । तर, धरौटी बुझाउन नसकेपछि उनी पनि कारागार चलान भएका छन् ।  

पक्राउ परेका नावालकलाई भने आफन्तको जिम्मा लगाएको सुनसरीका प्रहरी प्रमुख प्रहरी उपरीक्षक प्रभु ढकालले जानकारी दिएका छन् । 

गाउँमा लागेको मेलामा खाजा खान गएका ती नावालकले एक हजारको नक्कली नोट व्यापारीलाई दिएका थिए । व्यापारीलाई शंका लागि प्रहरीलाई खबर गरेका थिए । प्रहरीले सोधपुछ गर्दा बालकले रवीन्द्रले दिएको बयान दिएका थिए । एसपी ढकालले भने, “पछि रवीन्द्रलाई पक्राउ गरी सोधपुछ गर्दा श्यामदेव महेताले दिएको बताए ।” 

रवीन्द्रलाई नक्कली नोट दिने श्यामदेव स्थानीय व्यापारी हुन् । उनले थाहा पाएरै नक्कली नोट दिएको अनुसन्धानमा देखिएको उपरीक्षक ढकालले बताए । उनलाई नक्कली नोट कसले दियो भन्ने विषयमा श्यामदेवले केही नबताएकाले थप अनुसन्धान भइरहेको ढकालले जनाएका छन् ।
चुनावको बेला नक्कली नोटको कारोबार हुने सम्भावनालाई ध्यानमा राखेर विशेष निगरानी बढाएको उपरीक्षक ढकालले बताए । वारिपारी दुवैतर्फका प्रहरीसँगको सहकार्यमा संयुक्त गस्ती निगरानी बढाइएको उनले बताए । 

यता, सुनसरीका प्रमुख जिल्ला अधिकारी इन्द्रदेव यादवले नक्कली नोटको कारोबारलाई निर्वाचन थ्रेटको रुपमा प्रशासनले राख्ने गरेको बताएका छन् । अघिल्ला निर्वाचनमा जस्तै यसपटको निर्वाचनमा पनि नक्कली नोटको कारोबार सुरक्षा थ्रेट रहेको यादवले बताए । 

“खुला सीमा छ, चुनावकै बेला धेरै आर्थिक कारोबार हुन्छ भनेर गिरोहहरू सक्रिय हुने गरेका छन् । नक्कली नोट अलिअलि मिसाउँदै बजारमा पठाउने देखिएको छ,” प्रजिअ यादवले भने । 

यस्तो ‘थ्रेट’ रोक्नका लागि प्रशासनले विशेष अभियान सुरु गरेको प्रजिअ यादवले जानकारी दिए । हामीले नक्कली नोटको कारोबार रोक्न, भारतीय पक्षसँग पनि सहकार्य गर्दै सुरक्षा गस्ति भइरहेको प्रजिअ यादवले सुनाए ।
 
खुला सीमामा हुने मानिसको वारपार अर्को सुरक्षा चुनौती रहेको प्रशासनको भनाइ छ । भारतका छिमेकी जिल्लामा बसोबास गर्दै आएका यताका मतदातालाई चुनावको समयमा वारी ल्याउने र कब्जामा राख्दै भोट हाल्न लगाउने प्रवृत्ति छ । निजी हतियार पनि सुरक्षाको चुनौती हुने प्रशासनको भनाइ छ । 

सुनसरीका ५९ मतदान स्थललाई अति संवेदनशीलको रुपमा वर्गीकरण गरिएको छ । सुनसरी प्रशासनका अनुसार ६५ वटा संवेदनशील र ४२ वटा सामान्य रहेको छ । सुनसरीमा  १६६ मतदान स्थल र ५९१  मतदान केन्द्र रहेको छ ।