सुनसरी । सुनसरी–४ को राेमाञ्चक प्रतिस्पर्धामा नेपाली कांग्रेसका ज्ञानेन्द्रबहादुर कार्की विजयी हुँदै इतिहास रचे । 

भोजपुरमा लगातार तीनपटक चुनाव हारेका ज्ञानेन्द्र सुनसरी आएपछि लगातार दोस्रोपटक निर्वाचित भए । उनले सुनसरीमा कांग्रेसलाई ‘क्लिन स्विप’ हुनबाट जोगाए । 

तर, दोस्रोपटक चुनाव जित्न ज्ञानेन्द्रलाई निकै सकस पर्‍याे । धेरैले आशा मारेको अवस्थामा कार्कीले कमब्याक गर्दै ११२ को रोमाञ्चक मतान्तरले जित हासिल गरे । कार्कीले ३० हजार ४८३ मत ल्याउँदा एमालेका जगदीशप्रसाद कुसियैतले ३० हजार ३७१ मत ल्याए । 

एमालेले लियो ०७४ को बदला

क्षेत्र नम्बर ४ को अन्तिम नतिजा सार्वजनिक भएसँगै जिल्लाका सबै क्षेत्रको नतिजा आएको छ । सुनसरीमा चार प्रतिनिधिसभा र आठ प्रदेशसभा निर्वाचन क्षेत्र छन् । 

यहाँ नेकपा (एमाले)ले २०७४ को बदला लिएको छ । त्यतिबेला प्रतिनिधिसभातर्फ एक सिटमा खुम्चिएको एमालेले अहिले नेपाली कांग्रेसलाई झन्डै जितविहीन बनायाे । यसबाट कार्कीले जाेगाए  

प्रदेशसभातर्फ पनि सुनसरी–४ का दुवै क्षेत्रमा कांग्रेसले नै जित्यो । प्रदेशसभा ‘क’मा सदानन्द मण्डल र ‘ख’मा हाजी इस्राईल मन्सुरी विजयी भए । 

२०७४ को निर्वाचनमा प्रतिनिधिसभाका तीन क्षेत्र कांग्रेसले जितेको थियो । क्षेत्र नम्बर २ मा सिताराम महतो, ३ मा विजयकुमार गच्छदार र ४ मा कार्की निर्वाचित भएका थिए । 

एमालेबाट क्षेत्र नम्बर १ मा जयकुमार राई मात्रै विजयी भएका थिए । 

२०७९ को निर्वाचनमा ठिक उल्टो भएको छ । नेकपा (एमाले)ले प्रतिनिधिसभाका दुई र उसको समर्थनमा जनता समाजवादी पार्टी एक सिटमा विजयी भएको छ । प्रदेशसभाका ६ क्षेत्र पनि एमालेले जितेको छ । 

क्षेत्र नम्बर २ मा भीमप्रसाद आचार्य र ३ मा भगवती चौधरी विजयी भए भने क्षेत्र नम्बर १ मा जसपाका अशोक राईले जित हासिल गरे । 

सुनसरी–१ ‘क’मा रमेश बस्नेत र ‘ख’मा विजय राई, २ ‘क’मा रेवतीरमण भण्डारी, ‘ख’मा रामप्रसाद महतो तथा ३ ‘क’ मा रोहितबहादुर कार्की र ‘ख’ रामदेव यादव विजयी भए । 

कांग्रेसका पुराना नेताको साख गिर्दा एमालेलाई ‘हाइसन्चो’ 

सुनसरीमा नेपाली कांग्रेसका लागि २०७९ को निर्वाचन कठिन रह्यो । अघिल्लो निर्वाचनमा देशभर नेपाली कांग्रेस पराजित हुँदै गर्दा सुनसरीले साख जोगाएको थियो । तर, योपटक विपरीत भयो । 

प्रत्यक्षतर्फ देशभर कांग्रेस पहिलो पार्टी बन्दा सुनसरीमा भने सेलायो । यो निर्वाचनमा पुराना नेताहरू सबै पराजित भए । संसदीय राजनीतिका खेलाडी विजयकुमार गच्छदार ३० वर्षपछि जीवनको उत्तरार्द्धमा पराजित भए । तेस्रो प्रयासमा चिरपरिचित प्रतिद्वन्द्वी एमालेकी भगवती चौधरीले भारी मतान्तरले पराजित गरिन् । 

दुईपटकका विजेता सिताराम महतोको ह्याट्रिक गर्ने सपना पराजित भएसँगै तुहियो । एमालेका भीम आचार्यले महतोलाई ब्रेक लगाइदिए । 

दुईपटक पार्टीकाे जिल्ला सभापति भइसकेका र प्रदेश १ मा संसदीय दलको नेता बनेका कांग्रेस केन्द्रीय सदस्य राजीव कोइराला पनि पराजित भए । उनी पनि चिरपरिचित प्रतिद्वन्द्वी रामप्रसाद मेहतासँग झिनो मतान्तरले पराजित भए । कोइरालालाई प्रदेश १ को मुख्यमन्त्रीको प्रमुख दाबेदारको रूपमा हेरिएको थियो ।

प्रदेशसभातर्फ कांग्रेस प्रदेश १ का महामन्त्री उमेश थापा पनि पराजित भए । उनलाई कांग्रेस सुनसरीको खम्बाको रूपमा हेरिएको थियो । 

गठबन्धनका अरू दलको अवस्था पनि उस्तै

लोकतान्त्रिक वाम गठबन्धन बनाएर चुनावमा होमिएका अन्य दलका उमेदवारको अवस्था पनि नेपाली कांग्रेसको जस्तै बन्यो । 

गठबन्धनबाट उमेदवार बनेकाहरू प्रतिस्पर्धामा पराजित भए । इटहरीका पूर्वमेयर तथा माओवादी केन्द्रका उमेदवार द्वारिकलाल चौधरी पनि पराजित भए । उनी आफ्नै पूर्वसहकर्मी रेवतीरमण भण्डारीसँग भारी मतान्तरले पराजित भए  

माओवादीकै अन्य उमेदवारहरूले पनि उल्लेख्य मत ल्याउन सकेनन् । 

नेकपा (एकीकृत समाजवादी)का उमेदवारको अवस्था झनै नाजुक देखियो । उनीहरूले पनि अपेक्षाकृत मत ल्याउन सकेनन् ।