काठमाडौं । दयाहाङ राई र सौगात मल्ल जबजब पर्दामा एक साथ देखिन्छन् । उनीहरूका चलचित्रले बक्सअफिसमा ‘कमाल’ गर्छन् । पछिल्लो उदाहरण ‘कबड्डी’ लिए हुन्छ । अलि अगाडि जाने हो भने ‘लुट’ । 

‘लुट’ उच्च व्यापार मात्रै होइन कन्टेन्ट र प्रस्तुतिका हिसाबले पनि ट्रेन्ड सेटर चलचित्र हो । ‘कबड्डी’ व्यापारको ग्राफ उचाल्ने चलचित्र । 

तर, सिनेमामा यो जोडी निकै कम मात्रै एकसाथ देखिन्छ । रंगमञ्चको पृष्ठभूमीबाट चलचित्रको यात्रा तय गरेका दयाहाङ र सौगात ‘लुट’ यता लोकप्रिय अभिनेताको छवि बनाएका कलाकार पनि हुन् । यी दुईको छवि निकै लोभलाग्दो छ । परिणाम दुवै ‘अलटाइम विजी’ अभिनेता हुन् । हाइप बनाएका हुन् अथवा पब्लिसिटी नै नगरी आउने सिनेमा हुन्, उनीहरूका चलचित्र बाक्लै आइरहेका हुन्छन् ।
 
रोजाइका नायक, पारिश्रमिक महँगो त हुने नै भयो । तर, उनीहरूका चलचित्रले एकाधबाहेक आफ्नो छविजस्तो लोभलाग्दो व्यापार गरिरहेका भने हुँदैनन् । उनीहरूको क्यारेक्टरको आलोचना भने कमै हुँदै आएको छ । तर, पछिल्लो समय उनीहरू आलोचनामुक्त पनि छैनन् । दयाहाङलाई लगातार स्टोरियोटाइप क्यारेक्टरमा आइरहेको आरोप बाक्लै लाग्दै आइरहेको छ भने सौगातलाई लाउड अभिनय गरेको आलोचनाले पछ्याइरहेको छ । 

चलचित्रको कथा एक्लै काँधमा बोक्दा बक्स अफिसमा खासै जम्न नसेकका उनीहरू अहिले पुनः एकसाथ देखिने तयारीमा छन् । चलचित्र ‘दुई नम्बरी’मा उनीहरू एक साथ देखिँदैछन् । यो चलचित्रमा दयाहाङ र सौगात साथीको भूमिकामा छन् । उनीहरूले एउटै कथामा स्क्रिन सेयर गरेको यो चलचित्रले बक्सअफिसमा कस्तो कलेक्सन गर्छ, त्यो भने हेर्न बाँकी छ ।