विराटनगर । आत्महत्याका घटनामा बढोत्तरी भएपछि प्रदेश १ मा सचेतना अभियान सुरु गरिएको छ । आत्महत्या विकराल रुपमा अघि बढेपछि नियन्त्रणका लागि सचेतना अभियान सुरु गरिएको प्रहरीले जनाएको छ ।
१ नंं. प्रदेश प्रहरी कार्यालय विराटनगरले आन्तरिक मामिला तथा कानुन मन्त्रालयसँगको सहकार्यमा अभियान सुरु गरेको हो । आत्महत्या रोकथाम एवं नियन्त्रणको लागि विशेष अभियान सुरु गरिएको जनाइएको छ ।
विराटनगरमा आज जनचेतनामूलक र्याली निकालिएको छ । रोडशेष चोकबाट शुरु भएको र्याली जैन भवनमा पुगेर सभामा परिणत भएको थियो ।
त्यसअवसरमा बोल्दै प्रदेश १ का स्वास्थ्यमन्त्री जयराम यादवले आत्महत्या समस्याको रुपमा वृद्धि हुन थालेकोले यसको नियन्त्रणका लागि सर्वपक्षीय प्रयास जरुरी भएको बताए ।
मोरङका प्रमुख जिल्ला अधिकारी काशीराज दाहालले समाजको सामूहिक प्रयासबाट मात्र आत्महत्या न्यूनीकरणमा बल पुग्ने बताए । १ नं. प्रदेश प्रहरी कार्यालय विराटनगरका डीआईजी सुदीप गिरीले समाज सचेत भएमात्र आत्महत्या घटाउन सकिने सुनाए ।
र्यालीमा आफूलाई माया गरौँ, अमूल्य जीवन खेर नफालौँ, साहसी हुनुहोस्, बाँच्नुहोस र आफ्नो समस्या समाधान गर्नुहोस्, आत्महत्या गर्नु पाप हो जस्ता सचेतनामूलक सन्देश लेखिएका प्लेकार्ड प्रदर्शन गरिएको थियो ।
