काठमाडौं । साफ महिला च्याम्पियनसिपमा आज नेपालले चिरप्रतिद्वन्द्वी भारतविरुद्ध प्रतिस्पर्धा गर्दै छ । प्रायः उपाधिका लागि प्रतिस्पर्धा गर्ने नेपाल र भारत योपटक फाइनलमा स्थान बनाउनका लागि आमने–सामने हुँदै छन् ।नेपाल र भारतबीचको खेल त्रिपुरेश्वरस्थित दशरथ रंगशाला बेलुका साढे ५ बजे सुरु हुनेछ ।

नेपाल र भारत दोस्रोपटक सेमिफाइनलमा भिड्न लागेका हुन् । यसअघि, सन् २०१६ मा पनि यस्तै भएको छ । योपटक फरक छ त केवल स्थान । त्यति बेला प्रतियोगिता भारतको सिलिगुढीमा भएको थियो । अहिले काठमाडौंमा जारी छ ।

सेमिफाइनलका प्रतिद्वन्द्वी पनि लगभग उही छन् । फरक छ त केवल माल्दिभ्सको स्थान भुटानले लिएको छ । भुटानले अर्को सेमिफाइनलमा बंगलादेशविरुद्ध प्रतिस्पर्धा गर्नेछ ।

संयोग, त्यति बेला नेपाली टोलीको प्रशिक्षक कुमार थापा थिए । अहिले पनि नेपाली टोलीको जिम्मेवारी उनै थापाको काँधमा छ । त्यति बेला नेपाल भारतसँग ३–१ ले पराजित भएपछि पहिलोपटक फाइनल खेल्नबाट वञ्चित भएको थियो । नेपालले फाइनल नखेलेको त्यही एकपटक हो । अरू सबै संस्करणमा नेपालले र भारतसित फाइनल खेलेको छ ।

‘‘प्रतियोगितामा खेल्दै जाँदा एउटा न एउटा प्रतिद्वन्द्वीसँग भेट हुन्छ । अहिले भारतलाई प्रतिद्वन्द्वी पाएका छौँ,’’ नेपालका प्रशिक्षक कुमार थापाले भने, ‘‘यसअघि, २०१६ मा पनि यस्तै भएको थियो । तर, यस ६ वर्षबीचमा धेरै परिवर्तन भइसकेको छ । दुवै टिमले धेरै प्रगति गरिसकेका छन् । त्यति बेला ६ जनाले डेब्यु गरेका थिए । अहिले तीनजनाले डेब्यु गरेका छन् । त्यति बेला भारतको होम ग्राउन्ड थियो । अहिले नेपालको होम ग्राउन्ड छ ।’’

प्रशिक्षक थापाले भनेजस्तै त्यति बेला भारतले आफ्नो घरेलु मैदानमा खेलेको थियो । अहिले नेपालले आफ्नो घरेलु मैदानमा खेलिरहेको छ । हुन त अघिल्लो संस्करणको फाइनल पनि नेपालले आफ्नै घरेलु मैदानमा खेलेको थियो । तर, २०१९ को उक्त प्रतियोगिता विराटनगरमा भएको थियो ।

प्रशिक्षक थापा काठमाडौंमा घरेलु दर्शकलाई निराश नबनाउने बताउँछन् । ‘‘काठमाडौं देशको मात्र होइन, फुटबलको पनि राजधानी हो । यहाँको फुटबल माहोल गज्जबको हुने गर्छ । र, हामी एउटा क्लबको होइन, देशको प्रतिनिधित्व गरेर खेलिरहेका छौँ,’’ भारतविरुद्ध सेमिफाइनल खेलको अघिल्लो दिन थापाले बाह्रखरीसँग भने, ‘‘त्यसमाथि भारत भनेपछि माहोल अझ फरक हुन्छ । त्यो माहोलमा हामी इन्जोय गर्न चाहन्छौँ । खेलका लागि उत्साहित छौँ । उत्तिकै सचेत पनि छौँ । यहाँको वातावरणमा खुसी भएर खेल्नेछौँ र दर्शकलाई पनि खुसी बाँड्नेछौँ । हामी काठमाडौंका दर्शकलाई निराश बन्न दिँदैनौँ ।’’

थापाले खेलाडी करियरमा मनाङ–मर्स्याङ्दी क्लबबाट दशरथ रंगशालामै थुप्रैपटक लिगको उपाधि उचालेका छन् । त्यही रंगशालामा थापाले राष्ट्रिय जर्सी लगाएर थुप्रै खेल जितेका छन् । त्यसकारण उनलाई रंगशालाको माहोल थाहा छ । त्यहीअनुसार खेलाडीलाई तयार पनि पारेका छन् । नेपाल प्रतियोगितामा अपराजित छ ।

समूह ‘बी’मा रहेको नेपालले पहिलो खेलमा भुटानलाई ४–० ले हराएको थियो । दोस्रो खेलमा श्रीलंकामाथि ६–० को विजय हासिल गरेको थियो । भारत भने समूह चरणको अन्तिम खेलमा बंगलादेशसँग पराजित भएको थियो । त्यो हारसँगै भारत समूह ‘ए’को उपविजेता बन्यो । नेपालको प्रतिद्वन्द्वी भयो । प्रतियोगितामा भारत पराजित भएको त्यो नै पहिलोपटक हो ।

नेपालले अहिलेसम्म भारतलाई हराउन सकेको छैन । तर, प्रशिक्षक थापा सधैँ एउटै नतिजा नआउने बताउँछन् । थापालाई ६ वर्षअघि हारेको बदला लिने राम्रो अवसर पनि जुरेको छ ।

‘‘बदलाभन्दा पनि त्यति बेला हामी अवेमा हारेका थियौँ । अब होममा हार्न चाहँदैनौँ । र, सधैभरि एउटै टिमले जित्छ भन्ने पनि हुँदैन,’’ थापाले भने, ‘‘फुटबलको रोमाञ्चकता पनि त्यही त हो । हामी आनन्दले आफ्नो शैलीको फुटबल खेल्छौँ । नकआउट खेल हो भन्ने पनि थाहा छ । पेनाल्टीसम्म पुग्छ । हामी सबै अवस्थाका लागि तयार छौँ ।’’

भारतले पहिलो खेलमा पाकिस्तानलाई ३–० ले हराएको थियो । दोस्रो खेलमा माल्दिभ्समाथि ९–० को विजय हासिल गरेको थियो । तर, समूहको अन्तिम खेलमा बंगलादेशसँग पराजित भयो । त्योसँगै भारतको विजयी यात्रामा पूर्णविराम लागेको छ ।

“त्यो राम्रो नतिजा थिएन । बंगलादेशसँगको हारपछि हामी सबै निराश थियौँ । मैदानमा गोल गर्ने भोक हाम्रो तर्फबाट हराइरहेको थियो । तर, आयोजक नेपालविरुद्ध एक भएर खेल्नुपर्छ । हामी बलियो भएर फर्कनुपर्छ,’’ भारतका मुख्य प्रशिक्षक सुरेनकुमार क्षेत्रीले सेमिफाइनलको एक दिनअघि भनेका छन्, ‘‘पछिल्लो खेल हाम्रा लागि राम्रो पाठ थियो । यदि, हामीले प्रयास गरेनौँ भने कसैले हामीलाई हराउन सक्छ ।’’

बंगलादेशसँग हारेपछि भारत ‘घाइते बाघ’जस्तै भएको छ । त्यसकारण आज नेपाललाई भारतविरुद्धको खेल सहज भने हुने छैन । त्यसमाथि डेंगीका कारण मुख्य स्ट्राइकर सावित्रा भण्डारी आजको खेलमा पनि उपलब्ध हुनेमा शंका छ । सुरुमै डेंगीबाट थलिएकी मिडफिल्डर मञ्जलीकुमारी योञ्जन पनि उपलब्ध हुनेमा शंका छ ।

‘‘मञ्जली अस्पताल भर्ना भएर आएका कारण उनको सम्भावना न्यून नै छ । तर, सावित्राको अहिले भन्न सक्ने स्थिति छैन । हामीले मेडिकल टिमसँग छलफल गरिरहेका छौँ । सबै परीक्षण गरेका छौँ । त्यसको नतिजा आउन बाँकी छ । भोलि (आज) पुनः एकपटक सबै परीक्षण गर्नेछौँ । त्यसपछि खेलाउने/नखेलाउने थाहा हुन्छ,’’ प्रशिक्षक थापाले बिहीबार बाह्रखरीसँग भने ।

नेपाल र भारत विराटनगरमा सम्पन्न २०१९ को साफ च्याम्पियनसिप र पोखरामा सम्पन्न दक्षिण एसियाली खेलकुद (साग)मा पनि आमने–सामने भएका थिए । दुवै खेल भारतले जितेको थियो । साफमा ३–१ ले नतिजा आफ्नो पोल्टामा पारेको भारतले सागमा २–० को विजय हासिल गरेको थियो ।

‘‘नेपाल बलियो टोली हो । उनीहरूसँग राम्रा खेलाडी छन् । उनीहरूले १० गोल गरेर आफ्नो आक्रमण पक्ष देखाएका छन् । तर, उनीहरूको रक्षापंक्ति कति राम्रोसँग छ भनेर हेर्न बाँकी छ । नेपाललाई हामीसँग खेल्ने विगतको अनुभव छ । हामी विगतमा जस्तै आफ्नो क्षमता प्रमाणित गर्नमा केन्द्रित हुनेछौँ,’’ भारतका प्रशिक्षक क्षेत्रीलाई उद्धृत गर्दै भारतीय फुटबल संघको वेबसाइटमा लेखिएको छ, “हामीले प्रशिक्षणमा आक्रमण र रक्षापंक्ति दुवै क्षेत्रमा काम गरेका छौँ । अघिल्लो खेलमा ठूलो कम्युनिकेसन ग्याप थियो । फेरि त्यही गल्ती दोहोर्‍याउने छैनौँ ।’’

भारतले जारी प्रतियोगितामा १२ गोल गरेको छ । तीन गोल खाएको छ । त्यसको तुलनामा नेपालले १० गोल गरेको छ । गोल खाएको छैन । तर, नेपालले समूह चरणमा एक खेल कम खेलेको छ ।

भारतका प्रशिक्षक क्षेत्री नेपालको घरेलु समर्थकको दबाबबाट सचेत रहेको बताउँछन् । ‘‘फुटबल भनेको प्रशंसक र भिडको सामना गर्नु पनि हो । हामीले उनीहरूलाई देखाउन आवश्यक छ कि हामी यहाँ केका लागि छौँ । उनीहरूविरुद्ध नेपालमा खेल्नु हाम्रा लागि महत्त्वपूर्ण हुनेछ । यदि, हामीले तिनीहरूलाई मैदानभित्र र बाहिर राम्रोसँग सामना गर्‍यौँ भने हामीसँग तिनीहरूलाई हराउन सक्ने क्षमता छ,’’ प्रशिक्षक क्षेत्रीले थपे ।