काठमाडौं । नेपाल उद्योग वाणिज्य महासंघ र विज्ञापन बोर्डले विज्ञापन आचारसंहिता र विज्ञापनको राष्ट्रिय नीतिका विषयमा छलफल गरेको छ ।

विज्ञापन बोर्डले केही महिना अघिमात्र विज्ञापन उत्पादन, वितरण, प्रकाशन तथा प्रसारणसम्बन्धी आचारसंहिता, २०७९ सार्वजनिक गरेको थियो । 

कार्यक्रममा बोल्दै महासंघका अध्यक्षले गोल्छाले अर्थतन्त्रको विस्तारका लागि महासंघले अगाडि बढाएको राष्ट्रिय आर्थिक रूपान्तरण भिजन पेपरको कार्यान्वयनबाट नेपालमा विज्ञापन बजारको दायरालाई फराकिलो पार्ने कार्यमा समेत ठूलो सहयोग पुग्ने धारणा राखे ।

अर्थतन्त्र फस्टाए, उद्योग व्यवसाय बढे, नेपाल समृद्धितर्फ जान सके विज्ञापन व्यवसाय पनि सोही अनुसार फस्टाउने र यसको दायरा फराकिलो हुने उनको भनाइ छ । 

कुल विज्ञापनमा स्वदेशी विज्ञापनको अंश करिब ६० प्रतिशत र विदेशी विज्ञापनको अंश करिब ४० प्रतिशत रहेको गोल्छाले बताए ।

विज्ञापन सम्बन्धी नीति, कानुन, आचार संहिताको प्रभावकारी कार्यान्वयन हुन सकेमा यो क्षेत्रको भविष्य निकै राम्रो रहेको अध्यक्ष गोल्छाको भनाइ थियो ।

बोर्डका कार्यकारी अध्यक्ष लक्ष्मण हुमागाईं आचारसंहिताको प्रभावकारी कार्यान्वयनमा विज्ञापनदाता र महासंघको सहयोग बोर्डका लागि महत्त्वपूर्ण रहने बताए ।

बोर्डका कार्यकारी अध्यक्ष हुमागाईंले विज्ञापन व्यवसायलाई स्वच्छ मर्यादित, पारदर्शी र प्रतिस्पर्धी बनाउने उद्देश्यले विज्ञापनको राष्ट्रिय नीति ल्याउन खोजिएकोसमेत स्पष्ट  पारे ।

अधिकांश वक्ताहरूले आचासंहिताको प्रभावकारी कार्यान्वयन हुन सके विज्ञापन व्यवसायमा देखिएका विकृतिहरू स्वतः निष्क्रिय भई समग्र विज्ञापन व्यवसायको वृद्धिमा सहयोग पुुग्ने धारणा राखेको थिए ।