काठमाडौं । फियोरेन्टिनाका लुका जोभिक पेनाल्टीमा गोल गर्न चुकेपछि शनिबार राति इटालियन सिरी ‘ए’ फुटबलमा युभेन्टस हारबाट जोगिएको छ ।

पाहुना टोली युभेन्टसले आर्कडियुज मिलिकको गोलबाट नवौँ मिनेटमा अग्रता लिएको थियो । तर, २९औँ मिनेटमा फियोरेन्टिनाका क्रिस्टियन कौएमेले बराबरी गोल फर्काएका थिए ।

४४औँ मिनेटमा फियोरेन्टिनाले पेनाल्टीको अवसर पाएको थियो । तर, जोभिक पेनाल्टीमा चुक्दा फियोरेन्टिनाले अग्रता बढाउने अवसर गुमायो ।

योसँगै युभेन्टस हारबाट जोगिएको छ । युभेन्टस पाँच खेलबाट नौ अंक जोडेर लिग तालिकाको चौथो स्थानमा छ । फियोरेन्टिना ६ अंकका साथ दशौँ स्थानमा छ ।

आजै ‘मिलान डर्बी’मा एसी मिलान र इन्टर मिलानले प्रतिस्पर्धा गर्नेछन् ।