काठमाडौं । काठमाडौं उपत्यकामा उत्पादन हुने कुहिने फोहोर यहीँ नै व्यवस्थापन गर्ने भनिए पनि हालसम्म स्थान पहिचान हुन सकेको छैन । काठमाडौं महानगरपालिकाका प्रमुख बालेन्द्र शाह (बालेन)ले कुहिने फोहोर यहीँ व्यवस्थापन गर्ने घोषणा गरे पनि हालसम्म कार्यान्वयन  हुन सकेको छैन ।

सम्भावित पाँच स्थानको पहिचान गरिए पनि स्थानीय सकारात्मक हुन नसक्दा थप प्रक्रिया अघि बढ्न नसकेको कामपाले जनाएको छ ।

कामपाका प्रमुख बालेनको सचिवालय सदस्य सुनील लम्सालका अनुसार अहिलेसम्म विभिन्न पाँच स्थानमा ५० देखि १५० रोपनी जग्गाको पहिचान भएको छ । उक्त विषयमा स्थानीय सकारात्मक हुन नसकेको उनको भनाइ छ । उनीहरूलाई कुहिने फोहोरबाट मल उत्पादन गर्दा हुने फाइदा र त्यसको सकारात्मक पक्षका बारेमा जानकारी दिन आवश्यक रहेको लम्सालले बताए ।

स्थानीय सकारात्मक नभएकै कारण गएको साउन अन्तिम सातादेखि कीर्तिपुरमा केही कुहिने फोहोर व्यवस्थापन गर्ने भनिए पनि काम सुरु हुन नसकेको कामपाले जनाएको छ । तीन महिनापछि हानिकारक फोहोर बन्चरेडाँडामा नफाल्ने गरी कार्य अघि बढाइएको कामपाको दाबी छ ।

दुई महिनादेखि विसर्जन हुन नसकेको काठमाडौं उपत्यकाको फोहोर व्यवस्थापनको सम्बन्धमा बुधबार काठमाडौं, धादिङ र नुवाकोटका प्रमुख जिल्ला अधिकारी, सिसडोल र बन्चरेडाँडाका स्थानीयबीच भएको चारबुँदे सहमतिपछि बिहीबारदेखि साबिकबमोजिम फोहोर व्यवस्थापन हुन थालेको छ ।

पटक–पटकको सहमति कार्यान्वयन नगरेको भन्दै स्थानीयले समय–समयमा अवरोध गर्दा काठमाडौंमा फोहरको डंगुर थुप्रने गरेको छ । यसरी स्थानीयले सहमतिपछि पनि अवरोध गर्ने गरेकाले हालको सम्झौता पनि दीर्घकालीन नभएको भन्दै कामपाले अरू स्थानमा पनि फोहोर व्यवस्थापन गर्न स्थान पहिचानको काम जारी राखेको जनाएको छ ।

साबिकबमोजिम फोहोर व्यवस्थापनका लागि स्थानीयले अवरोध नगरे, पानी परेर बाटो बन्द नभए अबका १० दिनमा यसअघि थुप्रिएको सबै फोहोर अन्तिम व्यवस्थापनस्थलसम्म लैजाने कामपाको योजना छ । हाल कामपासहित अरू १७ स्थानीय तहको फोहोरको अन्तिम व्यवस्थापन बन्चरेडाँडामा हुने गरेको छ । रासस