काठमाडौं । पूर्वमाओवादी नेता एवं नेपाल समाजवादी पार्टीका अध्यक्ष डा. बाबुराम भट्टराईले संघीय निर्वाचनमा काठमाडौं–७ बाट छोरी मानुषी यमी भट्टराईलाई उमेदवार बनाउन प्रस्ताव गरेका छन् ।

नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’सँग उनले छोरी मानुषीसहित संघमा तीन सिटमा दाबी गरेका हुन् । भट्टराई नेतृत्वको नेसपा माओवादीकै चुनाव चिह्नबाट आसन्न निर्वाचनमा प्रतिस्पर्धा गर्दै छ ।

मंगलबार दुई पार्टीका नेताहरूले निर्वाचन आयोगमा माओवादी केन्द्रको चुनाव चिह्न गोलाकारभित्रको हँसिया हतौडाबाट प्रतिस्पर्धा गर्नका लागि निवेदन दिएका हुन् ।

संघका तीन सिटमा बाबुरामको दाबी
स्रोतका अनुसार मंगलबार बसेको माओवादी केन्द्रको स्थायी कमिटी बैठकमा अध्यक्ष प्रचण्डले डा. भट्टराई नेतृत्वको पार्टीले संघमा तीन सिट दाबी गरेको जानकारी गराएका थिए ।

त्यसमध्ये उनले छोरी मानुषीलाई काठमाडौं–७, पार्टीका अर्का अध्यक्ष महेन्द्र राय यादवलाई सर्लाही र गोविन्द चौधरीलाई नवलपरासीबाट संघको प्रत्यक्षतर्फको उमेदवार बनाउन प्रस्ताव गरेका छन् ।

नेता गंगा श्रेष्ठलाई सिन्धुलीबाट प्रदेशसभामा लडाउने तयारी छ ।

बाबुरामपुत्री मानुषीले काठमाडौं–७ बाट आफ्नो उमेदवारी रहने बताइन् । बाह्रखरीसँग उनले भनिन्, “मेरो उमेदवारी काठमाडौं–७ बाट हो । म जन्मेको हुर्केको क्षेत्र पनि यही हो ।”

०६४ सालको संविधानसभा निर्वाचनमा तत्कालीन नेकपा माओवादीकी नेत्री एवं मानुषीकी आमा हिसिला यमी काठमाडौं क्षेत्र नम्बर–७ बाट विजयी भएकी थिइन् । ०७० को संविधानसभा निर्वाचनमा काठमाडौं–७ बाटै उमेदवारी दिएकी हिसिला पराजित भएकी थिइन् ।

प्रत्यक्षमा नउठ्ने बाबुरामको संकेत
पार्टीका नेताहरूका लागि सिट व्यवस्थापनमा लागेका डा. बाबुराम भट्टराईले प्रत्यक्ष निर्वाचनमा आफू उमेदवार नबन्ने संकेत गरेका छन् ।

अध्यक्ष प्रचण्डले स्थायी कमिटी बैठकमा गरेको ‘ब्रिफिङ’लाई उद्धृत गर्दै एक नेताले भने, “बाबुरामजीले मेरो कारण माओवादीलाई समस्या हुँदैन भन्नुभएको छ । उहाँले सहकार्यका लागि बाधक बन्दिनँ भन्नुभएकाले सहकार्य सहज बन्छ ।”

डा. भट्टराईले तीन सिटमा मात्र दाबी गरेकाले उनले गोरखा माओवादीलाई छाड्न सक्ने चर्चा समेत छ ।

डा. भट्टराई ०६४ र ०७० को ०७४ सालमा गोरखाबाट निर्वाचित भएका थिए । ०७४ को निर्वाचनमा भट्टराई नेपाली कांग्रेसको गठबन्धनसँग मिलेर चुनाव लडेका थिए । सो क्रममा उनले माओवादी नेता नारायणकाजी श्रेष्ठलाई पराजित गरेका थिए ।

समानुपातिकमा पनि गर्न सक्छन् दाबी
एउटै चिह्नबाट प्रतिस्पर्धा गरे पनि केही समानुपातिक सिटमा समेत बाबुराम पक्षले दाबी गर्ने सम्भावना छ ।

माओवादी नेताहरूका अनुसार भविष्यमा एउटै पार्टी बनाउने लक्ष्यसहित डा. भट्टराई आएकाले समानुपातिक सिटमा पनि केही नेताहरूलाई समेट्न सकिन्छ । बाबुरामका कारण समानुपातिकमा केही मत बढ्न सक्ने नेताहरूको बुझाइ छ । समानुपातिकमा संघभन्दा प्रदेशमा बाबुराम पक्षका नेताहरूलाई समेट्न सकिने विकल्पबारे पनि छलफल भइरहेको माओवादी नेताहरू बताउँछन् ।