पोखरा । गण्डकी प्रदेशसभाको बैठक आउँदो भदौ ८ गतेसम्मका लागि स्थगित छ । लुम्बिनी, कर्णाली र सुदूरपश्चिम प्रदेशसभाको बजेट अधिवेशन सकिइसक्यो । तर, गण्डकीमा अझै केही विधेयक पारित गर्ने र सदन अन्त्य गर्ने सरकारको तयारी छ ।

गण्डकी प्रदेशसभाकी उपसभामुख सिर्जना शर्माले आश्चर्य मान्दै भनिन्, “अन्यत्र नचलेको सदन यहाँ किन चलाइरहेको हो कुन्नि !”

उनले अन्यत्रको सदन चले÷नचलेको बारे तीन प्रदेशका समकक्षीलाई फोनमार्फत सोधेकी थिइन् । सोध्नुको कारण थियो, गण्डकीका महिला सांसदको अन्तरप्रदेश भ्रमण । जसलाई यूएनडीपीले आर्थिक सहयोग गरेको छ ।

महिला सांसदको अन्तरप्रदेश भ्रमण कार्यक्रमको समन्वय उनै उपसभामुख शर्माले गरिरहेकी थिइन् । तर, निर्वाचन घोषणा भएको भन्दै कुनै भ्रमणमा नजाने निर्णय नेकपा (एमाले) संसदीय दलले गरेको छ । त्यस्तै निर्णय नेपाली कांग्रेसले पनि गरेको छ ।

निर्वाचन घोषणा भएकै कारण सांसदहरू भ्रमणमा नजाने भएका भने होइनन् । उनीहरू घुम्न जाने भनिएको तीनै प्रदेशका प्रदेशसभा बैठक अहिले नभएकाले जानुको औचित्य सकिएको हो ।

आसन्न निर्वाचनमा प्रतिस्पर्धा नगर्ने घोषणा गरिसकेकी उपसभामुख शर्मा भ्रमणमा जान उत्साहित थिइन् । गण्डकीमा २० महिला प्रदेशसभा सदस्य छन् । २० जना नै नगए पनि जानेहरूलाई लैजाने उनको तयारी थियो । उनी आफैँले अरू प्रदेशसभाका उपसभामुखहरूलाई फोन गरिन् । उनीहरूले संसद् स्थगित भइसकेको र सांसदहरू निर्वाचनमा केन्द्रित भई जिल्ला लागिसकेको जानकारी दिए ।

उनीहरूले उपसभामुख मात्र आउने भए स्वागतसम्म गर्न सकिने तर अरू सांसदहरूलाई भेला गर्न नसकिने जवाफ दिएका थिए । त्यसपछि कार्यक्रमको संयोजन गरिरहेकी शर्माले गएको बिहीबार दातृनिकाय यूएनडीपीलाई फोन गरेर भ्रमणमा सहभागी हुन नसकिने जानकारी गराइन् ।

यूएनडीपीले भदौ ५ देखि १२ गतेसम्म अन्तरप्रदेश भ्रमणमा जान भन्दै गण्डकीका महिला सांसदलाई निमन्त्रणा गरेको थियो । कार्यक्रमको मुख्य उद्देश्य अनुभव आदानप्रदान भनिएको थियो ।

यसअघि, सोही कार्यक्रमअन्तर्गत यूएनडीपीले गण्डकीका महिला सांसदलाई वाग्मती, मधेस प्रदेश र प्रदेश नम्बर–१ को भ्रमण गराएको थियो । बाँकी तीन प्रदेशको भ्रमण कोरोना महामारी, स्थानीय तह निर्वाचनलगायत कारण रोकिएको थियो ।

निर्वाचन घोषणा भएपछि कुनै पनि संसदीय समितिको भ्रमण र अन्तरप्रदेश भ्रमणमा नजान संसदीय दलका नेता पृथ्वी सुब्बा गुरुङले मौखिक निर्देशन दिएको एमाले सचेतक सावित्रा रानाले जानकारी दिइन् ।

कांग्रेस मुख्य सचेतक ओमकला गौतम चालिसेले पनि निर्वाचनमा केन्द्रित हुनुपर्ने भएका कारण महिला सांसदको भ्रमणमा कांग्रेस सहभागी नहुने जानकारी दिइन् ।