लसएन्जेल्स ।  अमेरिकाको सबैभन्दा सक्रिय वन डढेलो योसमाइट राष्ट्रिय निकुन्ज नजिक फैलिन थालेपछि क्यालिफोर्नियाको एक भागमा सरकारले आपतकालीन स्थितिको घोषणा गरेको छ । 

शुक्रबारयता जंगलका रुखमा लागेको आगो तीव्र गतिमा फैलिन थालेको छ । 

अग्निनियन्त्रकहरू आगोमाथि नियन्त्रण लिने प्रयासमा अझै जुटिरहेका छन् । तर क्यालिफोर्निया अग्निनियन्त्रण विभागले आगोले विस्फोटक रूप लिइरहेकाले नियन्त्रण गर्न कठिन भइरहेको बताएका छन् । 

आगोका कारण छ हजार बढी स्थानीय विस्थापित भइसकेका छन् भने १० वटा घर क्षतिग्रस्त भएका छन् । आपतकाल घोषित मारिपोसा काउन्टीले अब आगो नियन्त्रणका लागि केही संघीय सहयोगका लागि पहुँच प्राप्त गरेको छ ।

आगो निभाउने काममा करिब ४०० जना अग्निनियन्त्रक र ४ वटा हेलिकोप्टर परिचालित छन् । क्यालफायरका महिला प्रवक्ता नतासा फाउट्सले अधिकारीहरूले आगामी सातासम्म पनि आगो नियन्त्रणमा आउने छाँट नरहेको बताएको जानकारी दिएकी छन् ।  

बीबीसीबाट ।