बुटवल । उद्देश्यविपरीत काम गरेको आरोपमा रुपन्देहीको तिलोत्तमास्थित एउटा कल सेन्टरमा आइतबार प्रहरीले छापा मारेको छ ।

सूचना प्रवाह गर्ने र नागरिकलाई सहज सूचनाको पहुँच दिने उद्देश्यले खुलेको कल सेन्टरबाट भारतीय नागरिकलाई विभिन्न प्रलोभनमा पारी ठगी गर्ने गरेको उजुरीका आधारमा छापा परेको प्रहरीले जनाएको छ ।

तिलोत्तमा नगरपालिका–२, जानकीनगरमा चारतले घरको तीन फ्ल्याट भाडामा लिई ३०० जति कम्प्युटर राखी त्यसकै माध्यमबाट सर्वसाधारणलाई म्यासेज पठाई ‘ट्रयाप’मा पारेको प्रहरी अनुसन्धानबाट खुलेको छ । कल सेन्टरमा काम गर्ने १५० कर्मचारीलाई नियन्त्रणमा लिएको प्रहरीले जनाएको छ ।

चिनियाँ र भारतीय नागरिक समेतको लगानीमा खोलिएको उक्त कार्यालयबाट सर्वसाधारणको ह्वाट्सप र फेसबुकमा अश्लील म्यासेज पठाउने तथा चिट्ठा परेको भन्दै ठगी गर्ने गरेको प्रारम्भिक अनुसन्धानमा खुलेको इलाका प्रहरी कार्यालय बुटवलका प्रहरी नायब उपरीक्षक ठगबहादुर केसीले बताए । “कार्यालय सञ्चालक भारतीय नागरिकको घरकोठा खानतलासी हुँदै छ । त्यसपछि थप खुल्नेछ,” उनले भने ।

१५० भन्दा बढी महिला तथा पुरुष कर्मचारीलाई रोजगारी दिइएको सो कल सेन्टरमा अवैध काम हुने गरेको सूचनाका आधारमा छापा मारेको प्रहरीले पुष्टि गरेको छ । तर, अवैध कामका विषयमा प्रहरीले केही खुलाएको छैन ।

“हामी घटनास्थलमै छौँ, अनुसन्धान हुँदै छ,” रुपन्देही प्रहरी प्रमुख प्रहरी उपरीक्षक रवीन्द्र रेग्मीले भने ।